وين انت يا (ذْيَابْ) الليالي قصيره
والعمر يمضي وانته حْضورك غْيَاب
الاعمار مِثْل شْموع ليلٍ منيره
وان اصْبَحْ ابْن ادم يَرَى شَمْعَهَا ذاب
الكل فاني غير راعي الذخيره
اللى حسَبْ للباقيه عنده حْسَاب
تعال يا اللى ما لقينا نظيره
وما كل أصحاب الفتى صِدْق واصحاب
كَم واحدٍ تحْسبْه ما حَدّ غيره
صاحب وهو كاذب تدَثَّر بجِلْبَاب
يا (بو محمَّد) انْت نفسٍ صغيره!
تِكْبَرْ على الفاحِشْ وْخادِعْ وْرَيَّابْ
يعجبني اللى هو شراتك ضميره
صاحي إذا نام العَرَبْ بات بِحْسَاب
يخشى الحرام يْخَاف واهِجْ سعيره
ما يهتني بِرْقَاد والقلب مرتاب
الله يهَيِّيْ لك من الأمر خِيْره
يفتح لك أبوابٍ وْيَضْرِبْ لك أطْنَاب
واقولها تالي تراها قصيره
دنياك لا تَهْجِرْ موِدِّيْك يا (ذْيَابْ)