هَمْهَمَة موج - شعر: صالح الداغش

لا تسافر والمسا بَرْد والغرْبه عذاب

وانت لا سافَرْت تاخذ معاك اللي تبِيْه

انت تاخذْ كل شَيٍ تحِبّ بْلا حساب

غير ذكرى صاحبك، غير دَمْعَة ناظريه

تاخِذْ الكون الفسيح، السما، نَزْف السحاب

تاخذ الروض الخَضَر والأسامي والوجِيْه

تاخِذْ أنفاسي مَعِكْ والأماكن والرحاب

وْزِرْقَة البَحْر وبَعَض هَمْهَمات الموج فيه

انْت تاخِذْ ما تبي غيري وْجِلّ المصاب

ليتك اخترْت أحْدِنا في غيابٍ تشتهيه

لين يمدي صاحبك يرتوي بْهَذا السراب

وان تولاّه العَطَش بالوَهَم يملأ يديه

كيف يتلاشى حبيبك إلى حَدّ اليباب؟

وانت تلقى صورته كامنه في كل تِيْه

غِبْت واجِد بَسّ غَيْبَتْك هالمَرّه ذهاب

شِفْني أرْكِضْ خَلْف رَكْبِك وَلا ألْحَقْ عليه

انْت غِبْ في غرْبتك لين يغريك الإياب

وخَلّني في غربتي لين ألقى لك شبيه

خايفٍ تنسى السنين الطويلات العِذَابْ

وانكسارات الهوى وحِلْم كنّا نِقْتِنِيْه

وضحكة أطفالٍ تنامَتْ إلى حبّ وْعِتاب

كل ما يركض بي الهَمّ تَرْكِضْ تِتّلِيْه

جاني الحينه خَبَر: سافَر لْكِلّ الغياب

والحِبِر ما جَفّ والشِّعْر يتأسَّف عَلَيْه