دعوة لِلْفَرَحْ - شعر: سالم الزمر

خَل الحِزِنْ عَنْك وافْرَحْ ما اسْتِطِعْت وْقول

الحمد لِله إنّي عايش وْصَاحي

لي رِجِلْ تمشي وغيري في البشَر محمول

ولي عين تَنْظِرْ مسا عمري وإصباحي

لي كَف فيها دفا يوم البَعَضْ مَعْزول

والليل عينه وانا بالعين مصباحي

إفْرَحْ تباشَر تفاءَل عِيْش بالمعقول

باللى مَلَكْته وْخَل اللى مضَى وْراحي

لا تشْغِلْ النّفْس بالماضي وْبالمجهول

ما راح رَوَّح وْقِل في باكر أفراحي

واغْنَم من اليوم ما نالَتْ يديك وْطول

كاس المودّه وْقِل يا طِيْبها راحي

إشْرَبْ رضا بالرضا ترتاح يا مَعْلول

وِتْصِح يا صايحٍ هَمّي وْيا جْراحي

لا تشْغِلْ البال بالقايل وْبِالْمقيول

لا تشْغِلْ القلب بالعاذل وْباللاَّحي

إعْزِفْ على غصن وَجْدك لَحْنِكْ المَجْمول

لَحْنٍ تَمنَّاه (عبده) يْبوح ما باحي

لا تاخِذْ النَّفْس بالشِّده وْحِط حْمول

عن ظهر نفسك ببعض الضِّحْك وِمْزاحي

خَل الحِزِنْ عَنْك خَل الهَم ضِجّ وْقول

الحمد لِله إنّي بالأمَل صاحي