تزعل دواليك وْمتى تْريد

وِتْقول لي ذوق ابتعادي

غريب طبعك غير هالغيد

وْعن غير حِسْنِكْ والمبادي

عنود تجبر زمرة الصيد

تنقاد لك لو ما تقادي

كِلِّك عنادْ وْوِدِّكْ تْزِيْد

على العناد أكْثَرْ عنادي

وانا امتلى صدري تناهيد

زفرات، حَسْرات، وْجهادي

وكثر التوجِّد والتساهيد

عليك واللقيا مرادي

ما اقول تشبه رَبَّةْ البِيْد

لا... هي على شخصك تشادي

منّك خِذَتْ حِسْن وْخِذَتْ جِيْد

وْجَمْع الظبا تِلْع الجيادي

يا باشَة الغزلان يا سِيْد

ريوم مرتعها بلادي

ويا فايق البِيْض الأماليد

ويا نور ما عقبه سوادي

يشفع لشخصك والتعنّيد

رمزٍ عظيمٍ غير عادي

ما ادري غلا ما ادري توَدِّيْد

شَيٍ أحِسِّه غير عادي

ينبض بخَفَّاقْ وْمواريد

بِعْروق دَمّي بامتدادي

واحيا به شْعورٍ بتفنيد

على البسيطه والعبادي

انت الوحيد مْقَابَلِكْ عِيْد

حلمٍ ينَقِّضْ لي سهادي

ياليت تَصْدِفْك المواعيد

كان أشْبَعِكْ وارْوَاك صادي!