يا بوحمد - شعر: سالم الزمر

يا (بوحمد) شِكْراً على الوِد والطيب

ما أحْسَن أخلاقك وْوِدِّكْ وْطِيْبك

جِيْتِكْ وانا في الصدر عندي مطاليب

وانزاح هَمّي يوم جيت أنتخي بك

يكفي من أخلاقك جميل التراحيب

اللى على وجهك تبشِّرْ طليبك

أنا اشهد انّك واقفٍ بالمواجيب

تاخِذ من قْلوب المودّه نصيبك

رَجْلٍ على الشِّده بك الظن ما يْخيب

أنا اشهد انّه ظالمٍ من يعيبك

تحفظ لربعك وِد ما شِفْته يْغيب

لو غاب وِد الناس قمت أعْتزي بك

رَجْلٍ على الشِّدات لك يشهد الذيب

تسري وْضِدِّك عاجزٍ ما يصيبك

تَمْلِكْ قلوب رْجَال ما تَعْرِف العيب

رجال تشري ربْعِتِك وِتْهَذِيْ بك

رجال تشريهم بالاخلاق والطيب

مِثْلي وْيَمْلكهم ودادك وْطِيْبِكْ