صَفعَة والي! - شعر: شقران الزيادي

شَرَبْت بِنّ الرحيل وْهَيْل تغريبه

واخترت طَبْع الرجال وْمَيْلة عْقَالي

عندي تساوى الزمان وْطَرّ لي جيبه

من بَعْد ما خالَطْ العَلْقَم مَعْ الحالي

ما هو بوقتي يا اخو (شَقْران)! وِشْ لي به؟

صالَحْت نفسي مَعَ نفسي وبِلْحالي

تزعِجْك نَقّالة الهَرْجَه هَل الغِيْبه

لا من وطى واحدٍ مِنْهم على ظْلالي

أو قال لك صاحبك كِثْرَت مشاريبه

ما عاد له بالوطن والأهل والغالي

قِلْ له تساوى شروق النور وِمْغيبه

ما هو بهذا زماني يا بَعَدْ حالي

عابوا على الوَقْت.. كِلٍ منبعه عيبه

وكلٍ على قَدّ عزمه في السما عالي

هذي ظروف الزمن والوَقْت تدري به

ما جا على كيف أبوي وْلا تهيّا لي

هالعام سابِعْ وانا مْجَوِّد تَلاَلِيْبه

لاني تَرَكْته وَلا هو قَطَّع آمالي

يطيح لين أطْرِحِه وِيْقوم وازري به

واجوِّدِه واطْرحه وِيْقوم مِتْعَالي

وِش قِصِّتِه وش يبي وِشْ جاه ما ادري به

يا اخي تِعِبْنا معَه! ما اطْوَلْك يا بالي

إن كان هذا نصيبي يا هي مْصِيْبه

عِجْف الليالي تلاعَجْ بَرْقَهَا قْبَالي

هَوِّد.. على هونك، إهدا! لا تماري به

يا خوي ماني بحِمْل لْصَفْعَة الوالي

طالبك لا تِلْحَق الميسم وْتكوي به

يكفيني الأوَّلي لا تِلْحِق التالي

أليا سألك العذول وْقال لك جِيْبه

قِلْ له هبيلٍ تلقّى للخلا الخالي

هبيل يا كِبْر عَيبه يا حِلِو عيبه!

زِيْدوا عذاريب شَخْصٍ عايش مْثَالي

عيبه بياض وْنقا وِزْيَادَة الطيبه؟

يا ما اغْرَبِك يا زمان أشباه اْلِرْجَالِ

يا خوي نَجْمٍ أفَلْ جَتْكُم مناديبه

وِشْ ضَرّها الأرض.. نَجْم وْطاح مِنْ عالي