قال: قُولْ وقِلْت: قولي ما تهيّا

قال: حاوِلْ قِلْت: ما حولي حكايا

قِلْت: لحظه قال: هات الهَرْج هَيّا

وابتدا سَرْد الحقايق والقضايا

ليه غبت هْناك واحساسك هنيّا

صورتِك تبكي بدولاب الهدايا

قَبْل تنطق جمرتينك واتهيّا

ليه تترك مسكنك بين الحنايا

الزمن يكوي وزِدْت الكَيّ كَيّا

جيت لاجلك واردٍ حوض المنايا

لا يطول البِعْد يا عَذْب المحيَّا

ميسم فْراقك مسوّي بي سوايا

من يعزّي الشوق في موت الحميّا

إغْتِنِمْ وارْجَع عسى تلقى بقايا

كم على شانك دَحَرْت أهْل القفيّا

ما ابْرَدْ أعصابك على دَفْن الوصايا

ذَنْب قلبي لا زَهَمْته فيك عَيّا

وانت ما قصّرْت في حَشْد السرايا