لصدق: (قلب الحقيقه) يكسر ضْلوعه
الكذب: (قلب الحقيقه) وانت ما تدري؟
إنّ ابتسامة سنون الحقد مصنوعه
وانّي مع أهْل المثايل ما قصَر شِبْري!
إن عِشْت شِعْري نَهَر ما جف ينبوعه
وان مِتّ ظامي وفا واعتب على شِعْري
والحب: شَجْره ورا المعلوق مزروعه
ومحبّة الوالدين وبرّهم فِطْري
لكنّ من طاح له في حب دلّوعه
مشاعره في المحبّه بثها حصري
يمسي ويصبح وراسه مِتْعِبٍ كوعه
وان مَرّه النوم مَرّه طرقي وعبري!
بالذات لا كانت مْن الوقت مفجوعه
وانا الحميّه عليها شِبْت من صِغْري
أدعيك يا الله عسى دعواي مسموعه
ترحمني بْرَحْمِتِكْ وتوسِّعْ بْقَبْري
أرقام الاحزان في الشريان مطبوعه
والدم يجري ما هو داري بما يجري!
حتى المشاعر عن الخفَّاق ممنوعه
من كثر ما تكّت الضيقه على صدري
حاولت أحايل خفوقٍ ما هدا روعه
وانسى الذي فات واهوِّنْ على عمري
لو ان الافراح والأحلام مَشْروعه
من هَمِّي اللى طواني طي وِشْ عِذْري
يا صاحبي يا حصاد الهَم واللوعه
تحت أمرك العام والاّ اليوم تحت أمري
وجيه الآمال من فرقاك مصفوعه
ضايع وضيّعت مستقبَلْك يا صبري!
وِحْبال رجواي في عودَتْك مقطوعه
تنزلْ دموع الملوك ولا نزَلْ قدري!!