صبّوا لي مْن الدلال وزيدوا الهيل

البال ضايق وهاجوسي حداني

تعبت أدوِّر كلامٍ ما بَعَدْ قِيْل

عساني آوَصِّلْ احساسي عساني

واحترت بين الملخَّصْ والتفاصيل

وانته كفو للمهمّه يا لساني

أبَمْدَحْ ابن الشهامه صفوة الجيل

اللي لطاريه تنقاد المعاني

يا نَجْمنا اللى طلوعك يفضح الليل

سَلِّمْ على (الياه) وِ(سْهَيْل) اليماني

أنا أشهد انّك سحابٍ يَحْقِرْ السيل

يَمْطِرْ شموخ وْطموحات وْتفاني

كل الصعيبات قِدّامك تساهيل

في كل مضمار دايم الاوَّلاني

يا مِتْعِبْ الهجن والاَّ مِتْعِبْ الخيل

يعني على طول أزِف لْك التهاني

عدّلت قاموس الانجازات تعديل

وكتبت (أنا المنفرِدْ نادِرْ زماني)

فِعْلك يبَجِّلْك ما تحتاج تبجيل

والمجد يبقى لو ان العمر فاني

وان كان أهل (مصر) يفتخرون بالنيل

الشكر لله عطانا نيل ثاني

لويقسو الدهر وِتْشِح المحاصيل

وجهك يبشِّر بتحقيق الأماني

الوقت مايل وْكَفِّك يعدل الميل

والكون ضايق وصدرك مرحباني

شِعْرِكْ بحور وقصايدنا مواويل

شِعَّار لكن على اطراف المواني

حلحيل وانْت تْعَرِفْ مَعْناة حلحيل

يعني (كَسِرْ تيم) في كل المعاني

طَيِّبْ ومن طيب نفسك يرجح الكيل

بالفعل هَالطيب من طِيْب ا لمجاني

أبوك من ذَلَّلْ الصعبات تذليل

حَرَثْ بَحَرْ وانبت الصحرا مباني

بالحيل ما ابْعَدْت عن دَرْبه وبالحيل

تستاهل المَدْح من قاصي وداني

جَمَّعْت لك من ورود الشِّعر أكاليل

وْغَلَّفْتها بالوفا لكن تراني

لو امدحك من طلوع الشمس لِلّيل

أشوف شِعْري بمَدْحِكْ ما كفاني