ألا يا هاجسي يوم ان خبري فيك خبرٍ زين

قبل خمسة عشَر عامٍ مواقيفك بطوليّه

أبيك تْذَكِّر الناسين باللي صار ذاك الحين

من قبل العولمه واهل المحطَّات الفضائيّه

قبل لا يقضبون خْطَام (ريمه) شِلّة التخمين

وقبل لا يركبون شْدادها الجهَّال عاريّه

وقبل يسعون عِشَّاقْ الظهور وْكل شيٍ شين

وقبل لا يوجفون الناس خَيّاله وْرِجْليّه

يوم ان الشِّعر له هيبه وله قيمه وله تثمين

ومنزاله صدور العالَمْ اللي نارها حَيّه

يوم انه يستجل ويستهل ويفتخر وِيْبين

على روس المنابِر والمنصّات الخطابيّه

ولا تنساق وِتْسَانِعْ جزاله غير في الوافين

شيوخ القوم والعِرَّافْ والناس الكباريّه

مِثِلْ (حمدان بن مكتوم) ذِخْر مْعَرَّبْ الجَدّين

سلايل خير من رِكْبوا ظهور الخيل (ياسِيّه)

شيوخٍ سَطَّر التاريخ مجد أسلافها الماضين

على صِم الرمك بامَّات فتخه وام ربيّه

تعلّوا فوق هامات المعالي بالسخا والدين

على قمّة سنام المجد بِعْروشٍ (فلاسيّه)

قصور العِز مبناها حجر ما هوب لِبْن وْطِيْن

من أوّلها لتاليها على الناموس مَبْنِيّه

لا قِيْل الشيخ (حَمْدان الفلاسي) حَيّ ذيك العين

تسامت له نواميس المدايح ذي ورانيّه

جمع بين الزعامه والمَعِرْفه والكَرَمْ واللين

وقوّ الباس مَعْ فَن الرمايه والفروسيّه

يا سور الصين لا بالله قَطْع (الصين) واهْل (الصين)

يا سور العِز يا سور (الإمارات) الخليجيّه

بعد جونا عسوسك يا ربيع (دْبَي) مِسْترّين

على ذكر الحيا سِقْنا الظعن والنيّه النيّه

جذبني طِيْب ذِكْرك مثل بَرْق الوسم لِلْمِمْسِيْن

وجيت أشعب ذلولي من جنوب أرض (السعوديّه)

وْصَلّى الله على خير البريّه كل وقت وْحِيْن

شفيع الخَلْق في يومٍ يشيب الراس طاريّه

شفيع الخَلْق في يومٍ يشيب الراس طاريّه