يا الله يا كاسي عرى القاع بالريف

عقب الدهر تصبح رياضٍ مريفه

يا واليٍ بيده جميع التصاريف

وايده تَحَتْها يْدين غيره ضعيفه

ومن بعدها يا اهل الركاب المواجيف

جرد الرقاب مْلافحات السفيفه

هجنٍ على قطع الخرايم مشاعيف

عاداتها قطع الدروب الكليفه

لا زرفلن مع جو.. دوٍ.. مزاليف

تهرف كما تهرف سباعٍ مخيفه

ما فوقها الاّ كل باخص وعرّيف

مْفَرّدينٍ والمزاهب خفيفه

خلّو ركايبكم تنحَّر هل الكيف

أهل السلوم الكايدات الشريفه

واليا زمت قصور (ياس) المشاريف

اللّي على كل الشوامخ منيفه

إنصوا (الفلاسي) ماعليكم تكاليف

ضد الضديد وسعد ضيفٍ يضيفه

تلقون ضيفانه طروش وْمناكيف

يبغون شيخٍ ما يوَصَّف وصيفه

(حمدان) لاعدّوا كبار المواقيف

يمد يمنيً ما عليها نكيفه

ودّان وَسْميٍ نصوبه مراديف

ربيع من فاته ربيعه وصيفه

نوّه ركد ما فيه عَجّه وَلا زيف

يْشَوِّق فْواد السناوي رفيفه

ذراه يذري عن هبوب العواصيف

وْجوده ينَسِّينا السنين العجيفه

ظهر نبا طيبه من السِّيف للسِّيف

والطيب (حمدان) الفلاسي حليفه

كل الفعول الطيّبه والمعاريف

هو في نصيفه والعَرَبْ في نصيفه

واسلم عدد ما لَجْلجن بالغطاريف

وَرْق الحمام وْكل بيضاً عفيفه

وختامها يا مكرم الجار والضيف

اقبل سلام أهْل القلوب النظيفه