مْن الشجاعه التريّث في حَسِم بَعْض الأمور
وِمْن الرخامه التريِّث في مساعَدْة الخوي
وِمْن التسَرِّع نظرتك للغير بانْ عِنْده قصور
وِمْن الثبات انّك تشوف اللي ضعيف انّه قوي
وِمْن الغباء مقارنة نفسك مع وْلاة الأمور
وِمْن الذكاء انّك تجنِّب الطريق الملتوي
وِمْن الأدَب صَمْت الصغير بْمَجْلِس كْبار الحضور
وقِلّة أدَبْ إذا الرَجِل يرْشِد وهو ما هو سوي!
وِمْن العنا انِّك تخاف المقبلات مْن الشهور
وِمْن الغنى انّك بما تكسَبْ بيومك مِنْطوي
وِمْن الفوايد نَظْرَة العاثِر عليك انْك مْعَثُور
وِمْن الخساير انْك شَهْم وينظرون إنْك دْنُوي
وِمْن الفلاح إذا نجَحْت بْشَيّ ما صابك غرور
وِمْن الفشَلْ اذا تخاف مْن الفشل وانْت تْهَوي
وِمْن السعاده رِحْلةٍ تجمَعْ لك طْوال الشبور
وِمْن الشِّقا انّك تخاوي لك كسولٍ وِلْهوي
وِمْن النزاهه لا وثَقْ جارك بك انّك ما تبور
وِمْن الدناءه لا وثَقْ جارك بك انّك ملتوي
يا الله جَمِّلْني وَلا تشْمِت عَلَيْ بعض الصدور
لانّي بشَر أخطي واصيب بْقِدْرِتِكْ وانْت القوي