أنا شَفّ بالي يا الأجاويد دون حْلوف

أبقى بدارٍ عِزّها من وفا هَلْهَا

طبَعْ وِدّهم بين الحنايا النحاف حْروف

غلا واحترام وْهيبةٍ جَلّ مِرْسِلْهَا

معانيهم تْسامَتْ وْعَدَّت عن الموصوف

غَطَّت على موسوعة الفكر باكْمَلْها

عسى الحظوظ تْجود والقاسيات تْروف

رَبٍ عليم الغيب بامره يسَهِّلْهَا

وعسى السنين اللى تشطّ الحياة تْطوف

الله بطيب الحال والخير يَبْدِلْهَا

مضى العمر واحْنَا نْمِرْهُمْ يا الكرام ضْيوف

وهُمْ للمعاني قاعدتها ومزْمَلْهَا

رِدِيّ النوايا من قواميسهم مَحْذوف

جنوا من ثمار المعرفه وابْدوا أجْمَلْهَا

جزاك الإله بْخير يا فاعل المعروف

تحيَّاتْ (وَهْج) لْديرة الطيب تنقِلْهَا

سلامٍ بنَفْح المسْك والعَنْبر المديوف

إلى (دْبيّ) دار العِزّ داري توصِّلْهَا

عسى من حكَمْهَا ما تكدِّرْ صفاه ظْروف

عسى (دْبَيّ) تعْمَرْ به وتعلى محافِلْهَا