شعر: عبدالله الجابري

الحِزْن وَقْفَه.. والسعاده مشاوير

سِرْ في دروبك لا توَقِّف مكانك

والجَرْح، وان صابك، إخِذْ مِنْه تفسير

اْلِبْعِيْد هانك!!.. بس اْلِقْريب خانك

وْلا تْقول للعسرات صَعْبه وْما تْصير

سبحانه اللى لا طَلَبْته وعانك

والنَّفْس ما تِقْنَعْ ولَو دون تقصير

ولا حَد بكى في الوقت هذا عشانك

دنياك.. فيها خَيْر لو ما بهَا خَيْر

إلاّ انْت يا اللى ساعيٍ في هوانك

إبني لحلمك قصْر سوره تصاوير

آمالك سْياجه.. وْجِنْده عَيَانِك

وارْسِم على اوّل صِبْح يومك تباشير

واسعى لعِزّك هوب تسعى لْطِمَانِك

وْلا تَحْسِب.. فْـ بالك حساب المخاسير

يضيع مالِك بَسّ يبقى كيانك

النَّفْس لو مالَتْ عن الحَقّ بَتْصير..

كَنّك قبضت السّرْج واقفى حصانك

وان طاح حِلْمك دون سِبّه فَلا ضَيْر

راهَنْت به والحَظّ.. ضَيَّع رهانك

تحَمَّد الله واشْكِره صَبْح وِعْصير

هذا زمانك واقْتِنِعْ في زمانك