جرَحْني بك زماني والقدَرْ داوى جراحاتك
وانا مِنّك زماني ما قدَرْ يِسْعِف جراحاتي
تَبي أشْكي معاناتي لاجِلْ أرضي تفاهاتك
تَبي أنزِف دموعي لاجِلْ ما تظهر علاماتي!
تحَسْب انّي ضريرٍ ما أشوف إلاّ بنظراتك!
تحَسْب انّي أبَارْجَعْ لك وانا أحْمِل معاناتي!
أنا ما قِدْ عرَفْت أنّك تبادلني بلحظاتك
كذا تبغي على كيفك تشارِكْني بلحظاتي!
تعِبْت أنثِر تعِبْت أكْتِبْ تعِبْت أشْفَعْ لزَلاّتك
تعِبْت أزحَف ورا كِذْبك واشكي لك بنظراتي
قطاري يا حبيبي في المسا كلّه ترى فاتك
بيبقى لك نهاري ينتظر توصل محطّاتي
كفايَه ما بقى فيني وانا شكواي لك جاتك
أنادي لك وانا أسْمَع صدى صوت لْمناداتي
رضيت انّك تمشّيني وتفْرِضْ كِلْ قراراتك
تعال اسْمَعْ أنا وِدّي تبادلني قراراتي
خلاصة كلمتي فيها أبانهي بي علاقاتك
نسيتك يا بَعَدْ عمري وهذي لك خلاصاتي
سرَحْت بْعَالمك وانا تجَرْجِرْني ملَذّاتك
تصحّيني على هَمّك تمَسِّيني بآهاتي
تراسِلْني على كيفك وْتِتْناسى بِرَاحاتك
أنا بارْحَلْ وَلا يمكن أعاود لك بطَلاتي
دخيلك إبْتِعِدْ بَسّك ترى ما آبي حساباتك
وَلا حتى أبي منّك تحاسبني بزلاّتي
توارى حبّك وْ وَلّى وعِفْته من حماقاتك
وحبّي لك انا اعتَبْرِه حكايَه من حماقاتي
واذا تبغي تعاندني وْتتركني بصفحاتك
أبَاحْرِق دفترك كلّه واخَلّي لك كتاباتي
على فِكْره إذا تبغي تعاوِد لي اتّصالاتك
ترى رَقْمِك أنا والله مسحته من سِجّلاتي