دفتر النبت

الفِكْر زيت ودَمْعَة البـارِح سْـراج

والقَطْره اللي حوّلَت صَمْتي إزعـاج

هموم صدري من سبَبْها على صـاج

تقْبِل علـيّ أفـواج وِتْغـادِر أفـواج

طيّرْت حِلْمـي للسمـا ذات الابـراج

واخَذْت أغَنّي للمراسـي والامـواج

لعَلّ بوحي يشتعل صِدْق وَهّاج

الليله اللي صَدْرَها ريح وِعْجاج

ضيّعْت فيها كل مَدْخَل وْمِخْرَاج

الشاعر الغِرْبَه وانا غربتي تاج..

ما والله أحْبِسْ غربتي بين الادراج

أحِتاج واكْتِبْ صِدْق واكْتِبْ وَلا احتاج

وِطْعوني الخضرا لها ضيق وافراج

مهما تشيخ وْترتقي برْجَها العاج

والليل منفى العمْر والذاكـره خَبْـت

لا جمّدتني فـي منامـي وَ لا ذِبْـت

شبّتْ فتيلَتْهـا وانـا اللـي تلَهّبْـت

من مغرِبْ (الجمعه) ليا مغرِب (السَبْـت)

واخْضَرّ تَحْت ابراجها دَفْتَر النَبْـت

وابوح للمـا ليـن طِبْـت وتْشَعَّبْـت

في الليله اللي عَنْ مخاسيرها تِبْت

مشحون عاتِقْها من الضيق والكَبْت

وشَرَّقْت فيها بالخطاوي وغَرَّبْت

على جبيني طِبْت والاّ تعذَّبْت

حضَرْت وأيَّامي شدايد وَلا غِبْت

للنار والما لن تعذَّبْت وان طِبْت

وش كِبْرَها لا صار باعماقي النَبْت

تبقى الطعون نْياق والذاكره خَبْت!!