الدَّمْعه اللى تجْرَح الخَدّ حفْوَه

من نار صَدْري واكتساب الحراره

ما وَرّخَتْ والبال ما فيه صَفْوَه

والبوح ما سَلَّكْ مساحة مداره

كَنّيتها بالجوف والجوف كفْوَه

عَلَى جلاميد الصَّبِر صَبّ ناره

والنَّبْرَه اللى سادها الهَمّ خفوَه

على حنايا الجوف يعْزِف (جِتَاره)

والجَرْح ما ضِمِّد ويحتاج رَفْوَه

والجار ما يدري عَنْ أحْوال جاره

والدار من بَعْد المِحِبِّيْن جَفْوَه

والبسمَه اللى طَرِّفَتْ مِسْتعاره

واللى يِغِيب وْله على البال لَفْوَه

ما غاب عَنّي لين شاف انتصاره

لا والله إلاّ العين والنَّفْس شَفْوَه

وانّي على شوفه أسوق البشاره

وايلا خذيت بْحِضْن الاحلام غَفْوَه

يا ويني وْوَيْنه وما ابْعَدْ مزاره

كم لي وانا ادوِّرْ رضاته وْعَفْوه

ما ابِيْه يِتْسَرَّعْ عَلَيّ بْقراره

وَصُّوه لو دارَتْ بالايّام هَفْوَه

أنا عن أسْواء النوايا مجاره