بَتْبَيِّنْ «دْبَي» يا اللى تَبْغي تْبَيِّنْ
وْبَتْشوف فِعْل الرجال اللى يشَرِّفْها
ما عَمّروها على الهَيِّنْ يا ابو الهَيِّنْ
هم عَمّروها على أسْمٍ يعَرِّفْهَا
تْحَدّوا الصَّعْب خَلّوا الصَّعْب يِتْلَيَّنْ
يلين صارت على الأوَّل نصَنِّفْهَا
يا ثروة «دْبَي» ابْك «دْبَي» تِتْزَيَّنْ
رصيدها انْت لو تفْضَى مصارِفْهَا
يوم الدوَل لِلْفرَصْ يا شيخ تِتْحَيَّنْ
انته خَلَقْت العجايب في طوارِفْهَا
ويوم الجماعه من الأزمات تِتْدَيَّنْ
انته تكفَّلْت بالناس وْمَعَارِفْها
ما هَمِّنا قول من زَوَّرْ وْمن شَيَّنْ
ولا هَمِّنا قول حِسَّادٍ تحالِفْهَا
ما دامك بْخير وِبْراحاتٍ مْعَيّنْ
ما حَدّ به باس مِ الدِّنْيا وْتصَرِّفْها