عِيْدِك مطَرْ يروي ظما يابِسْ البِيْد
أو بَسْمة القمرا على صَفْحة المَيّ
عِيْدِك أماسي غَارِقه ب(الزغاريد)
عَذْب الأغاني صاغها (زامر الحَيْ)
عِيْدِك زَعَلْ.. عِيْدك فَرَح.. عِيْدِك العيد
تدرين إن العيد دونك وَلا شَيّ..!
عِيْدِك تباشير الزَّهَرْ والمواعيد
أحْلام ليلٍ يحتري مَوْلِد الضَّيّ
عِيْدِك (مناجاة) الندى للعناقيد
يمسح غبار الوقت بِشْوَي بِشْوَي
عِيْدِك سلام القَلْب وِمْصَافَحْ الإيْد
مِثْل انكساف الشَّمْس في حاجِبْ الفَيّ
عِيْدِك قديم السالفه.. عِشْقٍ جْديد
يَطْوي مسافات الغلا والعتَبْ طَيّ
أطْهَرْ من البَسْمَه بفَمّ المواليد
واجْمَلْ من ألوان الذَّهَبْ لا ضوى ضيّ
عِيْدِك شروق الحَظ بارْض (المقاريد)
وْيبْس القلوب يْصِيْر من شوفتك حي