شعر: حسين بن سودة

يا عِيْد ما عادَتْ مَعِي تَفْرِق.. تجي والاّ تروح

وش الجديد؟ اللي يسِرّ الحال يا العيد السعيد

عام أشتكي لك من جروح.. والعام ذا زادَتْ جروح

وان كان ما عندك جديد.. لا تقترِبْ خَلِّك بعيد

ما دام أشوف أن الوسايل (عَيْب) والمقصد شحوح

باقوم واذبَحْ غايتي من الوريد إلى الوريد

وما دام ما احْدٍ يستمِع الاسرار لو قرَّرْت أبوح

باحِطّ من دون الصَّدِر يا عيد بَوَّابة حديد

الوَقْت ما يحفظ صروح إلاّ يهِدّ أعْرَق صروح

وانا ضحيّة (عَلْمَنه) نظام عالَمْنا الجديد

تعبت وينك يا أمل وْضِقْت وينك ما تلوح؟!

ما تْشوفني من كَمْ سنَه واقِف على دربك وحيد

حتى طموح الشاعر المجنون ما عاده طموح

يحِسّ كَن الناس ما تقرا ولا تسْمَع قصيد