يا سلام الله على كل القروم

الرجال اللى تبين أفْعَالها

يا عضيدي لا تقلِّب في العلوم

خَلّها يا صاحبي في فالها

دامها طاحت عساها ما تقوم

مال أخو شيخه يا اخوي وْمَالها

ما خَلَقْنَا الله نفكِّر بالهموم

الحمول الكايده حِنَّا لَهَا

نَقْصِرْ الخطوه عن دْروب الرخوم

وْنَكْسِرْ أزْرَقْ عودها لِرْجَالَهَا

سَم بِسْم الله وْقايمتي تقوم

للسنود أرْقَى وْ وعْر جْبَالَهَا

بَارْتِكِي لِلْحِمْل في حَزَّةْ لزوم

ما اتوانى يوم هَل هْلالها

عَلِّموا الجَهَّال تحقيق الحلوم

كيف من لا شي نَخْلِقْ مالها

الغرير اللى يقول البيع دوم

ما شرب من دَلّته وِثْمَالها

هيّلوا له! هَيّلوا له! قوم قوم

اشرب الدَّلّه وْتَبْشِرْ فالها

ما خَلقَنْا الله نقلِّب في الهدوم

وْنحسِبْ الأيَّام مَعْ ترحالها

الليالي حامله بَارْبَعْ نجوم

نَجْمتينٍ في السما واحْدَى لَهَا

وْنَجْمةٍ تلْمَع وخالطها سموم

بنت عِز وْحاشمين أجْيَالها

والجدي ما احتاج في وصفه وسوم

بَيّنه لِلّى يفِكْ حْبَالَهَا

يا ختام المِسْك يا مِسْك مْخَتوم

عَطِّر أنفاسي وانا خَيَّالَهَا

بَهِّر دْلال الغَلا لِلّى يروم

وْباركوا لِلّى شرب فنجالها