شعر: سعد مرزوق الأحبابي

مْن الفَرَحْ باطير باطير باطير

أطير وين آطير؟ يا الله دخيلك

من يوم جيت وْقِلْت لي: يا مسا الخير

ضاعَتْ جميع عْلومي الله وكيلك

تَعَال يا وَجْه السَعَدْ والتباشير

تَعَال سولِفْ لي ترى الليل ليلك

سولِفْ عن أشواق النَّحل للنواوير

وسولِف عن أسرار الشفَقْ في جديلك

وابَسْألكْ ليش انْت يا صاحبي غَيْر

ذاك القمَر يا صاحبي وِشْ يجي لك؟

وتوّك صغير وْبالهوى ما انته صْغير

تْخَلّي مْلوك الغلا تنحني لك

وِتْسير بالشارِع وَلا كَنِّك تْسير

كَنّ الهبوب مْن الترافه تشيلك

في وَجْنِتِك بستان وَرْد وْعصافير

توّي عرَفْت أن الزَهَر ينتمي لك

وفي نَظْرِتِكْ هَمْسه وْقِصّه وْتعبير

وفي خافقي كلّ الغلا ساقني لك

لو فيه حكْم وْمملكه للغنادير

مَلَكْتهُم مَعْ احترامي لجِيْلِك

تعال أبي وَصْلِك يَكَفِّيْك تقصير

عطْني كثيرك ما كفاني قليلك

أبيك حبّ وْشوق واخلاص واصير..

قلبٍ ليا زادَتْ همومه يجي لك