إلاَّ الكرامه انْتِبِه واحْسِبْ حْسَاب

افتح لها قوسين واكْتِبْ (كرامه)

صحيح عَيْش وْمِلْح بالشَّعْبي أصحاب

دنيا تعَلّمنا وكلٍ مقامه

وش خانة الدنيا بلا عِزّ وِرْقاب

وش خانة العليا بلا طول هامه

حَدٍ على صدقه قضى العمر ينعاب

في زحمة أهْل الكِذْب للصِدْق شامه

مِثْل الغريق وْثاير الموج عَبَّاب

مات بْشَرَف يرفِض كفوف الرَّخامه

وحَدٍ يطيح وْتِفْزَعْ أعوان واقراب

واحْدٍ يطيح ولا استحَقّ السلامه

وْحَدٍ يجوع وْلا وقَفْ يوم طَلاَّبْ

واحْدٍ بلَيّا جوع يَطْلِبْ عَلاَمَه

وْحَدٍ مقزِّرْهَا بمصحف وْمحراب

واحْدٍ بشهر الصوم دَوِّر صيامه

أسراب عيشَتْها على طيبة أسراب

ضِعْتي وْمِتّيْ بْطِيْبتِك يا حمامه

قمّة غبائك تستر العيب بِثْياب

بَيْبين مَعْك العيب يوم القيامه

الله خَلَقْنا تْراب وِنْعود في تْراب

أمّا بْكرامه.. أو بليَّا كرامه!!