كِفّي سهامِك تكفي جْراح وِطْعون

سَلَّمْت أنا امري واعْتِرِف بالهزيمه

لِلّه دَرِّك من يحارب بالِعْيون..

غيرك، ومثلك يفتخِرْ بالجريمه

الحَرْب كَرّ وْفَرّ وِخْداع وِفْنون

وانتي جمَعْتي بين فَنّ وْعزيمه

يا اللي السِّحِر في عْيونك السود مَخْزون

تكفين لا تقسين كوني رحيمه

بِيْدك شفا مَجْروح واسعاد مَحْزون

بِيْدك نعيمه وْبِيْدك انتي جحيمه

قلبي أسيرك واطلقي قَيْد مَجْنون

مجنون ما له في الأسِرْ أيّ قِيْمه

يا فاتنه رِقّي على قَلْب مَفْتون

يحتاج مِنْك العَطْف وانتي كريمه

دَرْب الهوى به رَعْد وِبْروق وِمْزون

وانا على رجوى أمَل وَعْد غيمه

وِدّي أجيك وْخايف الناس يَدْرون

ونصبِحْ مِثَلْ لاهْل الحسَدْ والنميمه

يا بِنْت يكفينا تخاطِبْ بالِعْيون

مَلّيت واجَرْجِر ذيول الهزيمه