شعر: عبدالله الطفيلي

يا فَرْحَة أيَّامي وعِطْر التعاليل

يا اجمل معاني في رضاك وْعِتَابك

لي فتره اَقرا في الملامح تفاصيل

وَلا وجَدْت اللى يعوِّض غيابك

لا زِلْت أعيشِك حِلْم في هَجْعَة الليل

وافْرَحْ بطيفك في ذهابك وايابك

واشْعِل على طاريك قنديل قنديل

حتى ولو ما مَرّني إلاّ سرابك

لك في حنايا الروح صوت وْمداهيل

وصِدْق السؤال اللي يسامِر جوابك

يا شوق عمري يا سنيني المقابيل

شِفْ كل ما فيني يردِّدْ هلا بك

متى على وَصْلك تجود الهماليل

وتروي ظما قلبي بمزْنَة سحابك

وِيْزين في عودَتْك عِطْر التعاليل

وكل الذي كنت أفْقِده في غيابك