خِذْني على قَدّ الشِعِر عَقْلٍ لبَسْ جِنِّيّه
والبسني حْروزٍ غدَتْ لك خاتم (سْليمان)
وعلّمني بْدرس الهوى وش عرّفوا الحِنِّيّه
ملّيت من قانونك اللى طبَّق النّسيان
خِذْني بَحَرْ جالِسْ على ضِفّة لقا الحوريّه
وارْسِمْني بْحِلْم الغواني فارسٍ وِحْصان
خَلّ الليالي في قواميس الشّقا وَرْدِيّه
واطْلِقْ سَرَاح الطّاير اللى شافك البستان
من رِيْحَة الحِنّا تنَفَّس جَنّة الحرّيّه
ومن سبْحَة دْموع اللقا شاف السّواد ألوان
ذوّقني بْكسْرة بساطة روحك الطائيّه
طَعْم الثّرى وآخر حلوم اللي يسمّى انسان
واكسيني بْسِحْر الحيا موت النّفوس الحَيّه
كلْ ما لويت مْن الضّفاير وَارِقْ الأغصان
ذكّرني بْبَعْض الكلام اللى حوى العفويّه
من بَعْد ما سِرْب الثّقافه صاغ لي جنحان
سامِرْني بْهَمْس النّسيم وْرِقّةٍ جوريّه
خَلْني أحِسّ انّ الحياه اللى انت فيها جْنان
خَلّ المشاعر بالشّغَفْ لك عابده كوفيّه
علّمها وشْلون الهوى يسوى كنوز الجان
طالَتْ على ذاك الجواد الرّحْله الوَهْميّه
يرقب قطار الفرحه وْيترقّب (المِزْيان)
بَدْرٍ عطاه الله من اوصاف وْصفاوَة نِيّه
ما يَعْرِف ان جار الزّعل غير أجْمل الهَتّان
صاغ العيون الجايره باطلالةٍ نَجْديّه
واشبع غريزة فِطْرتي باجمل غصون البان
والبَسْ خمايِل وجنته توت وْحِلَلْ زهريّه
و خَذْ من رِمَال ( العين ) لون وْبزّر الأوجان
من (يَعْرُب) استَلّ الأصول الَذْرْبَه النّشْميّه
واغتالها غِمْد التّواضع وادّعى النّقصان
هو طَرْبة القلب الهواوي وْمنبع العَطْفيّه
هو تاج راس ... أرْض الهيام وْعاشق الأزمان
يا هو حديث قْصور حِسّ وْحاشيه شِعْريّه
يا الغايب الحاضِر هلا بك والهوى سلطان
يا من صنَعْت مْن المفاتِن تِحْفةٍ عاجيّه
لك صولجان العمر هَبْتِه وْحَقّك النِّكْران
خِذْني سفينه تايهه في مَمْلَكَه فُرْسِيّه
جنّبني جْنون المياه وْجلسة الشّطآن
عَلِّمني اقرا (آية الكرسي) واكفّر سَيّه
علّمني ان الوَقْت ما هو بَسْ شِعِر واحزان
علّمني اكْسِر شمعدان الشِّعر والنَّثْريّه
علّمني انّ الناس وَرْد وْدمّهم شيطان
فهّمني شْلون أقْدَرْ أنْسِجْ غفوةٍ حِلْميّه
طالَتْ مشاوير الأرَقْ وِمْنادَم الخِذْلان
قالوا لي ان العَالَم أصبح (قبرص) وْ(سوريّه)
واعذِرْني أصْلا عالمي ثاني وَلا لَه ثان
من بَعْد تلقيط المَحَار وْسَهْرةٍ قَمْريّه
واجْمَل طقوس العاطفه ومْقاسَم الرّمان
يوم اشبعِك من غَرْفَة النّهر الزّلالي رَيّه
ويمنَعْك خوفك مِ النّهر والاّ العِذِر ( ثعبان)
أطْرِبْك بِبْحور القصايد واعْذَبْ الوَصْفِيّه
وانظرْك ذايب تطْرِب اسماعي (بليله دان)
لا بد لِلّى قِدْ مضى صوب البَخَتْ من جَيّه
والاّ البخت من يوم يومه ما رقى إلاّ هان
من هالصّبِر ما قِدْ بقى غير أكْتِبِكْ مَرْثيّه
واكْتِبْ على ذاك الجدار اللي هجرته (كان)
وان قَدَّر الله والتقينا بآخر الإنسيّه
وْشِفْتَك وسابَقْنا بَعَضْ في قولنا يا (فْلان)
خِذْني على قَدّ الشِّعِر عَقْلٍ لبَسْ جِنيّه
والبسني حْروزٍ غدَتْ لك خاتم (سْليمان)