شعر: قمرة

صوتِك وقَلْبِك والله إنه تغَيّر

اللي عَرَفْتِه غَيْر واللي معي غَيْر

واشيا كثيره عن فراقك تشيّر

وِتْلوعني وتْحِطّ في القلب تكسير

فدْوَه يا عمري جيت كلّي مسيّر

أبَاعْتِذِرْ لك لو حصَلْ شَيّ تقصير

أنت الكبير.. وانا وذَنْبي صَغَيّر

خِذْني وْحِطْ لْزلّتي أيّ تبرير

لا تسمَعْ عْلوم الحقود الحقَيّر

اللي تزيده كل ما زاد تحقير

هَوِّنْ على القَلْب العطيب المحيّر

اللى يْخَلْق لْك الفرَصْ والمعاذير

شِفْ جِفْن عيني من غيابك سهيّر

يسهر مَعَ حلْو الصوَرْ والتصاوير

أخاف لا يصبح هوانا مذَيّر

وِنْكابد أوجاع الجفا والمخاسير

والعمر مهما طال حَدّه قصَيِّر

وِبْحِبّ (قمره) أنت أجْدَرْ من الغير

وانا وَلو عندي مجال آتخيّر

آخِذْك واخْلِق لي جناحين واطير