تصَدِّق والاّ ما تْصَدِّق.. أنا عاجز عن التفكير

تَعالْ وْشوفْ بِعْيونك غَيابكْ وشْ عمَلْ فيني

حبيبي ما بقى عندي صَبر.. يتْحَمَّلْ التأخير

رَحَلْتْ.. وعِقْبكْ الدنيا غلاها طاح مِنْ عيني

أجَاوِبْ إللِّي يسْألني عَنْ أخْبَاري واقول بْخير

وانا لا خير بِغْيابكْ.. وَلا حَاجه.. تهنّيني

على طاريكْ كِل لحظه.. ولا أحتاج للتذكير

حَريصْ القلب ما ينسَى عيونِكْ، لا توصّيني

ما احَدْ يقْدَر يعَوِّضْنِي لأنِّك.. في عيوني غير

ومَهْمَا شِفت أنا الفَرْحَه.. بدونِكْ ما تسَلّيني

أنا خِنْتِكْ.. وهالغلطه حبيبي ما لَهَا تبرير

علاقة حُبْ مَجْنُونَه.. ما بينْ أحْزاني وْبيني

وكيف الحَالْ وِشْ لوني.. جوابٍ ما يَبي تَفْسير

بدونِكْ إنْتْ، ما تضْحَكْ حَياتي وْترْمِشْ سْنيني

مِثِلْ شَاعِرْ عجَزْ يوصَفْ شعوره وْخانه التعبير

أنا ضايع.. ولا أدري مِن فْراقِكْ.. أنا ويني

مِثِلْ طيرٍ كِسَرْ بُعْدِكْ جَناحَهْ وْما قِدَرْت آطير

أحَاوِلْ أبْتِسِمْ وانْسَى ولكنْ وِشْ ينَسِّيْني..؟!

أشُوفِكْ في صباحي إنْت مَعْنَى يا صباح الخير

واشُوفِكْ في مَسَائي حِلْم وَرْدي.. لا تصَحّيْني

تِصَدِّق.. السَهَر يَرْسِمْ عيوني وْيتْقِنْ التصوير

ويشقّ النور في صفحة حياتي.. وما ألاقيني

أنامْ اشْ لونْ وْمشكلتي عِجَزْت ألقى لَهَا تدبير

طلَبْت النومْ.. لحظاته وْعَيَّا النوم يَعْطيني

تغيَّر وَجْهِي.. مْن أوَّل غيابكْ وابْتِدا التأثير

حبيبي.. مْن التَّعَبْ كافي خذيتْ اللَّى يكَفّيني

يا أغلى مِنْ رَحَل عَنِّي يا كِلْ الحبْ والتقدير

تعَالْ: إنْ كان لِي عنْدِكْ مَعَزَّه وْكان تَغْليني

تعَالْ: إنْ كنتْ تعشقني واذا فعلاً تبي لي خير

تعال: وْمِدّ لي.. كَفّ الوَصِل.. وآمِدّ كَفّيني

إذا كانْ الجفا واجِبْ بدا منْ قلبي التقصير

أبيكْ الحِينْ.. تِرْجَعْ لِي ولا تِرْجَعْ تخَلّيني

أنا ما اقولْ اللّي صَار فِيني ما هقيته يْصير

لأنّي كِنْت مِتْأكِّد بأنْ البُعْد يَنْهيني