شعر: ناصر راشد

شَرْقي.. وَلا تسأليني ليش مِتْعَصِّب

من يوم يومي وانا شَرْقي وبالفِطْرَه

غَيَّار حتى من الكلمه إذا قِيْلَتْ

واغار من فِكْرةٍ واغار من نَظْرَه

واغار حتى من التشجيع من واحِد

شَجَّع فتاتي وانا ما آمِنِه مَكْرِه

وش لون والأخّ يعْلِن: مُعْجَبٍ مُعْجَبْ

يا زين زيني وانا الشاهد على خِسْره

الصِدْغ يَلْبِط ودَمّي يغلي ويَهْدِر

والعين تقْرا وقَلْبي يلعَنْ وْيكْرَه

ما ارضى فتاتي تغازِل واحدٍ غيري

لو هو خيالٍ أو انّه ترجمة فِكْره

قولي أناني.. ظلومٍ.. حاسدٍ شَرْقي

قولي وهِلّي دموعك قَطْرَةٍ قَطْرَه

إن كان للشِّعْر عندك موردٍ ظامي

اخْذي من الشِرْب من قلبي إلى السكْرَه

وان كان للفِكْر عندك كلمه وْمعنى

فِلّي حروفٍ حشيمه ما لها كَسْرَه

عن يطمع اللى مريض القلب مِنْ يقرا

ويْشوف في عرْض غيره حلوَه السَهْره

خَلّي يقولون عَنِّك رجْل هُبْ حرْمَه

وش ضَرّ وانتي مَعِي حوريّة (البصره)

إن كان جايز كلامي؛ العِرْس من باكر

والاّ فلا تَلْطمين الخَدّ في بُكْرَه

ما دام ما جاز قولي.. الله الحافِظْ

خَلِّك مع المَدْح والتشجيع والشهْرَه

والاّ أنا سِمْعتي والعرْض مصيونه

لا بو فِكِر حرْمةٍ يَرِّثْني الحَسْرَه!!