أمانه يا الهبوب المغرباني

نسيمك بَرْد وِفْـ جوفي سعير

أنا ما طاب جَرْحي الأوَّلاني

ونَقْض الجَرْح يا قلبي خطير

أحِسّ الشوق بِيْفِكّ المحاني

وانا ما عاد لي في الصبر خير

غيابه حَطّ لي جَرْح وْبَرَاني

وشَمَّت بي عدوّي والحقير!

جمَعْني حِلْم للريح وْذَرَاني

ومَيَّل بي مِثِل شَمْس العِصَيْر

وصوته لو وصَلْ سَمْعي حيَاني

تباشَر به وْهَنَّاه البشير

تعال آباتَحَدّى بك زماني

تعال العمر مَرّه وانت غير

تَعَالْ بْصَادِقْ الحبّ وْحناني

تَعَالْ اوقَفْ معي وقفة برير

تَعَالْ وْخَلّ هالدنيا عشاني

وانا مرسى وْقبطان وْسفير

معاك آشوف تحقيق الأماني

وْحِسّادي على حِلْمي كثير

تغَنّى لك تلاحين الأغاني

ويدفعني لك الشيّ الكبير

واشوف الناس من حولك تعاني

مَاْ هو أيّات مَعْروف وْشهير

على الرِكْن الشمالي الاطرفاني

عيونٍ تشغَل البال وْتثير

تطالعني ونظراته تباني

أسافر في سما حبّه واطير

وانا لو بِيْدي آغَيِّرْ مكاني

أو آغَمِّضْ عيوني واستدير

أو انّي أخْتِلِقْ له عمْر ثاني

وَ اغَيِّر في إتّجاهات المصير