شعر: حمد الدعيّة

(طشّونه) حلوَه والحلا فِـ (امبونك)

يا اللى تحَلِّين الكلام العادي

تفنّني في لَهْجِتِك وِفْنونك

إروي ظما كَبْدي وْجوع فْوادي

يا فاتنه ما ترْحمي مَفْتونك

اللى يحَذْف الصوت لِكْ وِيْنَادي

ما يبغي إلاّ رَمْسِتِكْ وِشْجونك

وآهات قلبك والنسيم الهادي

الليل خَلْفِكْ والفَجِرْ من دونِكْ

والوَرْد والموت الحَمَرْ والكادي

واقبالتِك واطلالتِك وِعْيونك

وخوخك ورمّانك وْتِيْن الوادي

والخَنْجَر اللي صوّبَتْ مَطْعونِكْ

والجَمْرَه اللى لونها وَقَّادي

هذي هي أشيائك وهذا لونِكْ

وانا على الله غايتي وِمْرادي

وان قلتي آنا أخافهم يقرونِك

أقول لِكْ يا نور عيني عادي!

يا الله عساهم كلّهم يفْدونِكْ

الشِعْر شِعْري والزناد زْنَادي