شعر: خالد عبدالله الظنحاني

القاده اللى في دروب القاده

تَسْرِدْ حكايات الزمن وامجاده

من يوم ما خِضْت الشِّعِر وِبْحوره

وانا أدَوِّر للمعاني ساده

شِفْت المسافه في المسافه جَذْوه

أشْعِلْ بها ضَيّ الفخَرْ وابعاده

واحساسي اللى يستفِزّ احساسي

يَبْني الوَعَدْ في نفسي الوَقَّاده

المَجْد واضِحْ في وِلِيّ بْلادي

فِكْر وْمهابه وامتداد وْفَاده

والعِلْم ماثِلْ في مساره واكْثَرْ

عَلَّم (وِبِسْتَرْ) سِرّ عِزّ بْلاده

مَبْروك يا (مْحَمَّدْ) بمِلئ المعنى

وْمَبْروك للعِلْم بْضِيَاكْ افناده

من وين ما يَمَّمْت وَجْهِكْ قايد

يعني القياده تفتخِرْ بك عاده

صَرْح الجساره ماضيٍ لك حاضر

أسْطورة المَجْد التليد سْنَاده

لِكْ بالكَرَمْ مَبْنى وْمَعْنى آخر

منظومة خْصَالْ وْسلوم وْزاده

شَرْقي نَعَمْ شَرْقي عظيم المبدا

يفْتَحْ لِكْ التاريخ باب أسعاده

نَهْجِكْ على نَهْج الكريم الشامخ

حاكم بلاد الشَّرْق فَخْر أنداده

الحَمْد نَبْض الحَمْد باسمه عالي

الله وَهَبْنَا في (حَمَدْنَا) رْيَاده

فَرْح (الفجيره) اليوم ما يِتْصَوَّرْ

إزْداد مِنْك ازداد فِيْك زْيَاده

يا شيخ لو كان الشِّعِر يِتْجَسَّد

إن كان أدَّى لك تحيّة قاده

مَبْروك يا (مْحَمَّدْ) بمِلئ العالَمْ

وْمَبْروك لِلْعِلْم وْضِيَاكْ ارشاده