شعر: حمدان المحرّمي

من جيْت أقفِّر خطاوي ثَرْك وأتّبّعِك

آشوف زولك... واتابِعْ سَلْكَة رْيولك

وقّفت أعايِنْ أثَرْ مَشْيَتْك واتْسَمَّعِك

يمكن يرِدّ الصدى لا اهْتَزَّت حْيولِكْ!

أتخيّلك يوم رَمْضا القايله.. توجِعِك

وِتْميل لا مال مَعْ شَيْلَتْك.. مَيْدولِكْ

كَنّك: غتَلْ موز يِتْوَسَّدْ طَرَف فارِعِك

لاهَزّه النود.. قام يْرَقِّصْ حْمولِكْ!!

ما اغْواك ما اغْنَجْك ما أحلاك ما أرْوَعك

ثَغْرِك يواني عِنَبْ والخَمْر مَعْسولِكْ

رمّان شامي توسَّد من على مَطلعِك

لا اهْتَزّ نَحْرِك.. تِقَطّع مِنْه حابولك

من يوم تقفي تعيّنّي على مصْرعِك

أعاين القَلْب يتْرَقَّصْ على (طْبولِكْ)

كَنّ الحيا لا لبَسْت عْبَاتِك يْصارِعِكْ

ما رام يَسْتِرْ سِمَان الحول من طولِكْ

مِنْ خَيْر شايِبْ كِثِرْ ما حَبّك وْدَلَّعِكْ

ما لام ثوبِك.. وَلا دَنْتيل مَرْيولِكْ!

تمشي وصَدْر الثرى لا سِرْت يتْجَرَّعِكْ

ما كَنّ زولٍ خِطَرْ.. وِيْشابهه زَوْلِكْ

من ترْضِف غْشَاكْ يا ويلي على برْقِعِكْ

آضيع من واقعي وآعيش مَجْهولِكْ

أدْعَجْ غَرَنْجي.. سواد الكحل ما ينْفَعك

لا ارخيت رمشك تغيِّب حال مَقْتولك

من يوم أشوفك يَاْ كَنّ الموت يمشي مَعِك

ما غير أعاينْ أثَرْك وْسَلْكَة رْيولك