شعر: سعود المصعبي

يا جْيوش قيفاني تعالي واطربيني بالنشيد

اللى يحقِّق من حماسه للأمَمْ آمالها

يا صَيْحَةْ (العنتر إبن شدّاد) وِيّا (ابن الوليد)

يا خْيول فكر (إبن الرشيد) إليا انْطَلَقْ خَيّالها

روحي جدى كل العَرَبْ لبّي نداهات القصيد

خَلِّي على التاريخ صيحه والسعود بْفَالها

شِبّي مِنْ ضْلوعي سَنَا حْروفك على قافٍ فريد

خَلّي جماهير الشِعِر تطرب على مَوّالها

لاْنّي من العسجد كتبتك راية شْموخٍ مجيد

تبقى على مَرّ الزمن متفاخره بافْعَالها

يا ارهف من رْذاذ المطَرْ واقْسى من أوتاد الحديد

يا اشْمَخْ من جْبالٍ كأنّ السِحْب صارَت شالها

في ساحة الشَّعَّار لك موعد ولك بصمه أكيد

يستاهل السامع تغاريدك مَعَ شَلاّلها

من دارنا دار الفخر دارٍ لها مَجْدٍ تليد

أمجادها يشْهَدْ لها التاريخ عَبْر أجيالها

من دار (زايد) منبعك شاعر طموحاته بعيد

يوصل بها تخليص الامّه من جميع أغلالها

لاْنّي وَلَد (زايد) وْ(زايد) فِكْرِه بْجوفي مديد

يحْمِلْ هموم الأمّه اللى في الشدايد شالها

رَدَّوانّا غزيْنا حْصون (كِسْرى) وقادرين إنّالها

دْ بإن دَمّ العَرَبْ أغلى من النَّفْط الزهيد

إيماننا هو نَفْطنا واخلاصنا دايم يزيد

واحْنَا جسَد واحد ميادين العلا نرقى لها

وانا وسِطْ صدري شعوب أوطانها نَبْض الوريد

وامثِّل دْيَار العَرَب من آلها لى آلها

أسْتَحْقِر التفجير والإرهاب والكيد البليد

اللى يشنّه هالعدو باسْم العَرَب وِعْيَالها

واحنا لهم دِرْع الثرى جِنْد الوغى جيش (الرشيد)

الله ينصرنا على كيد العدى واهوالها

يا (عْرَاقنا) يا (قِدْسِنَا)، (لبناننا) نْزيد وْنعيد

ما نْذوق لذّه للمنام إلاَّ تعود لْحَالها

يا أمّة الإسلام يا سَيْفٍ له العالَمْ يحيد

أيّام كِنّا يَدّ وحْده يا كِثِر أبطالها

آثارها في جِيْد هالكوكب مِثِلْ كَيّ العنيد

اللى تشافى من حثاله يا كِثِر أنذالها

واليوم ما نشكي سوى بِعْد الأيادي من جديد

وايمان يا ليته يعود لأمّته وِرْجالها

يا جْيوش قيفاني تعالي واطربيني بالنشيد

اللى يحقِّقْ من حماسه لِلأمَمْ آمالها