شعر: عتيق خلفان الكعبي

مَلامِحْ

نُوْر الْفَجِرْ يَعْرِفْ وْ يَدْرِكْ مَعَانِيْه

               مِنْ قَامْ فِيْ وَقْت الأذَانْ وْ غِبَشْ بِهْ

رَجْلٍ تَرَتِّلْ فِيْ سِجُوْدِهْ مَحَانِيْه

              وْ كِلْ دَمْع بِخْشُوْعه لِرَبّهْ جَهَشْ بِهْ

لِهْ قَلْب يَنْبِضْ بِالطِّهِرْ مَعْ ثِوَانِيْه

              وْ بِهْ رَفْرَفْ الْعِصْفُوْر عِشْق وْ نِقَشْ بِهْ

وَجْهِهْ سِمَا مِنْ آخِرِهْ لَيْن دَانِيْه

              وْ صَدْرِهْ نِثَرْ بِهْ عِطْر وَرْد وْ فَرَشْ بِهْ

لا مَا شِكَا لِلْوَقْت جَرْحٍ يِعَانِيْه

               وْ لا مَا بِكَى مَهْمَا زِمَانِهْ بِطَشْ بِهْ

يَرْسِمْ عَلَى خْدُوْد السَّحَايِبْ أمَانِيْه

               وْ بِضْلُوْع صَدْره يِنْبِتْ الْغَيْث عِشْبِهْ

صَوْت الْمِطَرْ يِشْبه عِذُوْبَةْ أغَانِيْه

                مِنْ يِسْتِمِعْ لِهْ بِالْوَلَهْ يِنْدِهِشْ بِهْ

لِهْ بَيْت ثِبْتَتْ بِالْمِكَارِمْ مِبَانِيْه

               كَمْ ضَيْف فِيْ عِسْر اللِّيَالِيْ هِبَشْ بِهْ

كَفّهْ بَحَرْ وِ الْجُوْد وَاسِعْ مِوَانِيْه

                مِنْ بِهْ رِسَا مَا جَاعْ فِيْه وْ عِطَشْ بِهْ

لِلْمَجْد طُوْل الْعِمر مِعْلِنْ تِفَانِيْه

                وْ كِلْ دَرْب فِيْه الْفَخر شَدّ وْ طَرَشْ بِهْ

الْعَيْب مَا دَاسه وْ لا صَارْ جَانِيْه

                 وْ لا مَا وِقَعْ فِيْ الْعَيْب يَوْم وْ بِلِشْ بِهْ

حِيْن النَّذِلْ يِتْبَعْ خِطَاوِيْ غِوَانِيْه

                الشَّهم طَرْفه لِلرِّدَى مَا رِمَشْ بِهْ

وْ صَاحِبْ عِزَيْتِهْ يْثِيْب وَ ابْدَى تِوَانِيْه

                لَوْ طَاحْ بَيْن الْقَوْم لا تْقُوْل وِشْ بِهْ..؟

مِنْ بِهْ حِسَدْ فِيْ دِنْيِتِهْ مِنْ يِدَانِيْه

                الْبِعْد عَنِّهْ خَيْر وِ الْقِرْب نِشْبِهْ

رَاعِيْ الْمَعَانِيْ خَابْ مِنْ كَانْ شَانِيْه

                مِنْ عَابْ طِيْبِهْ لَوْ حِكَى مَا خِدَشْ بِهْ

شَوْفه فَرَحْ تَسْبِقْ عِنَاقه تَهَانِيْه

              وْ مِنْ بَسْمِتِهْ غِصْن الزَّهَرْ يِنْتِعِشْ بِهْ

طباعة Email
تعليقات

تعليقات