شعــر: سيـــف السَّعْـــدي

لَيْلَةْ رِبِيْع

لَيْلِهْ وْ لا ألْف لَيْلِهْ

         لَيْلَةْ رِبِيْع.. وْ سِمَرْ

وِاللَّيْل سَرَّحْ جِدِيْلِهْ

        عَلَى مَرَايَا الْقُمَرْ..!

كَالْبِنّ وَ انْفَاسْ هَيْلِهْ

        عِشْقٍ عِتَقْ .. وِاخْتِمَرْ

وِاحْنَا سِنِيْنٍ طِوِيْلِهْ

        مِثْل النِّظَرْ وِالثِّمَرْ

مَيَّلْ قَبِلْ لا اسْتِمِيْلِهْ

         وِالْعَيْن.. مَوْتٍ حَمَرْ

نَشْوَى وْ نَعْسَا.. كِحِيْلِهْ

         فِيْهَا صِبِيْهَا غُمَرْ..!

وَانَا.. بِرُوْق وْمِخِيْلِهْ

        لَمَّا غَرَامِيْ انْهِمَرْ

وِاللَّى تِبَاطَى حِصِيْلِهْ

       بَعْد انْهِمَارِيْ.. ثِمَرْ

طباعة Email
تعليقات

تعليقات