سِيْرَةْ الْوَرْد

الأرْض مِنْ عِقْب الْمِطَرْ رِيْحها وَرْد

يَا شَاعِرْ الصِّبْح الْهِوَاجِيْس: دِيْرِهْ

 

حِلْوَهْ تِفَاصِيْل الشِّتَا أوَّلْ الْبَرْد

تَمْطِرْ وْتَرْوِيْنَا أمَانِيْ كِثِيْرِهْ

 

وَقْت يْتِسَامَى فِيْ أحَاسِيْس كِلْ فَرْد

جَرْح يْتِسَاقَطْ بِالثِّوَانِيْ الأخِيْرِهْ

 

أبَعْتِذِرْ يَا الْبَوْح يَا الصَّمْت يَا السَّرْد

وْ كِلِّيْ شِكِرْ يَا رُوْحِيْ الْمِسْتِخِيْرِهْ

 

طَقّ الْمِطَرْ.. فَاحَتْ عِطِرْ سِيْرَةْ الوَرْد

وِالأرْض غَنَّتْ مِنْ سِوَالِفْ عِبِيْرِهْ