هَتَّانْ و صَيِّبْ
مِنِّكْ - صِبَاحْ الْخَيْر- فِيْ ذِمِّتِيْ.. غَيْر..!!
عِدْهَا - دِخِيْلِكْ - لَوْ تِكَرَّمْت.. مَرَّهْ
هذَا الْكَلاَمْ اللَّى يِوَقِّعْ لِهْ الطَّيْر
وْهذَا الْغَرَامْ اللَّى يِوَدِّيْ (الْمِجَرَّهْ)
كَنِّكْ مِطَرْ.. تِحْيِيْ بِصَدْرِيْ نِوَاوِيْر
هَتَّانْ كَرَّهْ وْ صَيِّبْ الْغَيْث كَرَّهْ
وْ كَنِّكْ تِسُوْق أحْلاَمْ عِمْرِيْ تِبَاشِيْر
وْ كَنِّكْ تِسَلِّمْنِيْ زِمَامْ الْمِسَرَّهْ
كِلْمَا بَلَغْ سَمْعِيْ مِنْ شْفَاكْ تَعْبِيْر
خِلْت النَّعِيْم وْ خِلْت ذِيْك الأَسِرّهْ
كَنِّيْ وْ كَنِّكْ يَوْم نَهْمِسْ.. عِصَافِيْر
لَوْ سِمْعِنَا رَاعِيْ الْحِسَدْ مَاتْ.. حَرَّهْ
لا بِخل فِيْ حِبِّكْ وْ لا فِيْه تَبْذِيْر
لَذَّةْ قِلِيْل وْ ذَوْق.. لِلّهْ دَرَّهْ
إِنْت السِّفَرْ يَمْشِيْ بِرِجْلَيْن..!! وِيْسِيْر
ضَوْح الْقِمَرْ وِمْسَلِّفْ الشَّمْس.. غِرّهْ
مَا تَوِّجَوْا بِالتَّاجْ حَسْنَا غَنَادِيْر
إِلاَّ بِرَاسْ التَّاجْ حَطَّوْك.. دُرّهْ
