ذِكْرَى الْغِنَى

لا تحْسِبُوْني.. مِنْ عَنَا الدِّنْيَا خِلِيْ

كَمْ لِيْ أخَبِّيْ بَيْن طَيَّاتِيْ.. عَنَا

 

لي أمنيه: مَا هِيْب لِيْ مَا هِيْب لِيْ

لكنّني.. آحَقّ شَخْص بْهَا.. هِنَا..!

 

خَبِّرْ كِرِيْمٍ صَاحْ: إبْشِرْيَا (عِلِيْ)

سِمَعْت صَوْتِكْ.. بَسّ مَا شِفْتِكْ سَنَا..!!

 

وْخَبِّرْ مَنْ اللَّى شَانْ بِيْ عِنْد آهَلِيْ

إنْت اتِّلَوَّنْ.. بَسّ أنَا عدْنِيْ أنَا

 

عدْنِيْ العزيز اللَّى أثَرْ مَشْيه جِلِيْ

وعدْنِيْ الْكِرِيْم اللى يِضِيْق مْن الثَّنَا

 

وعدْنِيْ الشِّجَاعْ اللَّى رَخَصْ أغْلَى الحُلِيْ

وْبَاعِهِنْ يَشْرِيْ بِهِنْ (تِرْس) وْ(قَنَا)

 

وعدْنِيْ الفقير.. اللَّى تحَتْ قَهْر الغُلِيْ

رَدَّتْ بِهْ الذِّكْرَى لأيَّامْ الْغِنَى

 

يِضِيْق كل ما أجْوَدْ ثْيَابه بِلِيْ

وِيْقُوْم يَرْمِيْهِنْ فِـ زَاوِيْة الْفَنَا

 

عِدْنِيْ وعدْنِيْ.. وِالزَّمَانْ اللَّى يَلِيْ

يَسْرِقْ مِنْ اللِّقْمه مَلَذَّاتْ الْهَنَا

 

يا وَقْت يَكْفِيْ.. مِنْ همومي مِمْتِلِيْ

لَوْنِيْ أسَرِّيْ خاطري بْلَحْن وْغِنَا

 

مَانِيْ خِلِيْ.. واللّه أنَا مَانِي خِلِيْ

أخايِلْ الْبَارِقْ.. إلَى مِنِّهْ دَنَا

 

واقول: ظامي.. سُوْق أمْطارك إلِيْ

وِتْصِيْح أحْلامي غِبِنْ: اللّه لِنَا

 

يَا مَجْلِسْ الْخِطَّارْ يا الْقَصْر الْعِلِيْ

هذا أنا جاني وِيِجْهَلْ وِشْ جَنَى..!!

 

مَخْنُوْق مِنْ صِبْحِيْ فِـ.. بَاحَةْ مَنْزِلِيْ

أشْكُوْ تِبَارِيْحِيْ.. لجِدْرَانْ الْبِنَا

 

يا بَاقَةْ الأحْلام باللّه إسْألِيْ

لا مِنْ ذِبَلْ وَرْدِكْ فِـ يَدّ اللَّى اعْتِنَى

 

صِيْحِيْ بْعِلِوّ الصَّوْت مِنْ ضِيْق وْقِلِيْ:

لا يُؤْخَذْ (السَّارِقْ) بِجُرْم اللَّى (زَنَى)

 

وْقُوْلِيْ: (عِلِيْ) أدْرَى بما يَخْفِيْ (عِلِيْ)

وْقُوْلِيْ: أنَا مَا عَادْ أدْرِيْ مَنْ أنَا..؟!

تعليقات

تعليقات