شعر: الذيب الوهيبي
الْمَاطِرْ الْهَمَّالْ
قَلّ اتِّصَالِكْ يَا - حَبِيْبِيْ - عَجَبْ قَلّ!!
عِنْدِيْ عَلَى شَاشَةْ سِمَا الْحِبّ مَا بِنْت
مِنْ مِدَّةْ اسْبُوْعَيْن مِنْهَاجِكْ اخْتَلّ..!
مَا كِنْت تِقْطَعْ رَحْمَةْ الْوَصل مَا كِنْت
مَا مَلِّتِكْ عَيْنِيْ وْلاَ خَاطِرِيْ مَلّ
وْمَانِيْ مْطَالِعْ غَيْر حِسْنِكْ حِسِنْ بِنْت
مِنْ غَيْر وَصْلِكْ مَا نِدَوِّرْ وَصِلْ خِلّ
لَوْ مِنْ بَنَاتْ الْحُوْر مَلْيُوْن كَوَّنْت
غَيْرِكْ عَلَى قَلْبِيْ مْحَرَّمْ وْ لاَ حَلّ
سِلْطَانْ حِبِّكْ دَاخِلْ الْقَلْب سَكَّنْت
حِبِّكْ عَلَى عَرْش الشَّرَايِيْن مِحْتَلّ
مِنْ حَيْثِكْ بْقَلْبِيْ سِكَنْت وْتِمَكَّنْت
إنْت الْكِرِيْم اللَّى لِنَا مَاطره هَلّ
وَانَا الْوِدُوْد اللَّى عَلَى صَوْتِكْ أدْمَنْت
النُّوْر هَدّ الدَّاجْ يَوْم الضِّيَا حَلّ
وِالْعَدل ضِدّ الْمَيْل.. لا هِنْت لا هِنْت
خَلّ الْغَرَامْ الْمِحْتَرَمْ بَيْنِنَا خَلّ
بَآخِرْ مِحِيْط الْحِبّ نَبْحِرْ.. أنَا وِانْت