شعر: عبدالله علي الشامسي
تَمَازِجْ حِرُوْف
عَلَى ايَّةْ حال والْبَسْمه تمُرّك والظُّروف طْوال
أنا لي دَرْب لو وِدِّكْ مِشَيْته مِنْ تَعَالِيْلي
تحَسْب إنّ الرِّجا مَيِّتْ وَاحَسْب انّ الْغَلا قَتَّال
وَاشوف انّ الرِّجا في آخِره ما هَدّ لِيْ حَيْلي
مَعَايْ الدَّرْب لكِنّه مَعَ كِثْر العَنا رَحَّال
لِك اللّه وَيْن ما شَدَّيْت رَكْبِكْ شِدّ لِيْ لَيْلِيْ
قتيل الْخَدّ والنَّظْره مَعَ مَفْرُوْد حَبّ الخال
وْصَوْتٍ لا سِمِعْتِهْ يِعْل يَفْقِدْني مُوَاوِيْلي
رجيتِك لا تِفِكّ الباب في وَجْه السِّنين رْمال
وتِقْطَعْ حَبْلِك اللَّى لا قِطَعْته وَيْن يَمْدِيْ لِيْ
خِوِيِّك ما تِمَنَّى غير خُوَّةْ لى وِسِيْع البال
وشيطان الشِّعِرْ ما جَازْ له وَصْفي وْتَحْلِيْلِيْ
لِيْ الدَّرْب الطِّوِيْل وْلِك مَعْ الْخَالِيْن دَمْع ٍ سال
وْصَوْتٍ يَمْزِجْ حْروفي مَعَ فِسْتانِك النِّيْلِيْ
تِبَسَّمْ يا شِبِيْه الرِّيْم.. عَيْنِكْ ما عَلَيْهَا كْحَالْ
وخَلّ الضِّيْق لِعْيُونِيْ.. وْخَلّ الْهَمّ تَفْصِيْلِيْ
