يَا شَيْخِنَا

يَا شَيْخِنَا يِفْرَحْ بِكْ الْفَوْز

وْنَامُوْس مِنْ أسْمِكْ يِشِلِّهْ

 

عَادَةْ ركابك تَلْطِمْ رْمُوْز

وِتْشَرِّفْ الْمَيْدَانْ كِلِّهْ

 

لَى رَكْضِهِنْ مَا هُوْب مَهْزُوْز

وِالرَّقَمْ وَاحِدْ مَا تِضِلِّهْ

 

دَايِمْ عَنْ النَّامُوْس مَا تْيُوْز

وْعَنْ الخطوط تْحَلْف بَاللّه

 

شِعَارها بِالنَّصر مَرْزُوْز

وْمِرْكَاضْهَا مَا هُبْ مَمَلّهْ

 

عَلَى (الْمِبَاشِرْ) تَفْرِضْ بْرُوْز

وِالظَّنّ فِيْهَا فِيْ مَحَلِّهْ

 

تِلْعَبْ عَلَى الأعْصَابْ.. وِتْفُوْز

وْلاَ غَيْر اْلاوَّل تَسْتِحِلِّهْ

 

وْبِالزِّعْفِرَانْ الْغَالِيْ تْرُوْز

وْتِنْزَادْ (مَلِّهْ) فَوْق (مَلِّهْ)

 

وْلَوْ عَالْمِعَنَّقْ يِنْوِضِعْ (رَوْز)

(الرَّوْز) تِسْتَاهَلْه كِلِّهْ

 

مَا احْلَى التَّهَانِيْ عِقْب لِحْفُوْز

لَى تَنْعِشْ الْقَلْب وْتِبِلِّهْ

 

وِالضِّيْق عَنَّا كِلِّهْ يْخُوْز

وِالسَّبْق يَشْفِيْ كِلّ عِلِّهْ

 

عَالْفَوْز دَايِمْ يَعْلِكْ تْحُوْز

يَا شَيْخ يَا نُوْر الْمَحَلِّهْ