فَوْق الْجِبَلْ لِيْ بَيْت مِنْ طِيْن مَبْنَايْ

كِلْ صِبْح يِشْرَبْ مِنْ رِذَاذْ السَّحَايِبْ

 

مِنْ شِرْفِتِهْ أنْظِرْ إلَى طِهِرْ دِنْيَايْ

وِتْهُوْن بِعْيُوْنِيْ جِمِيْع الْمِصَايِبْ

 

يِمِرِّنِيْ (رَاعِيْ الْغَنَمْ) يَعْزِفْ (النَّايْ)

صَدْره مِنْ جْرُوْح الْمِحِبِّيْن طَايِبْ

 

وِيْمِرِّنِيْ (عِصْفُوْر) بِالرِّيْش مَكْسَايْ

يَشْدُوْ.. وْ كَنِّهْ لِيْ عَنْ الْحِزِنْ ثَايِبْ

 

وِ(الظَّبِيْ) يِوْقَفْ قِرْبِيْ وْ يِسْمَعْ غْنَايْ..!!

لِيْ صَارْ صَاحِبْ دُوْن كِلّ الْقَرَايِبْ

 

نُوْر الْفَجِرْ قَبَّلْ جِبِيْنِيْ وْ يَمْنَايْ

وْعِطْر الزَّهَرْ عَانَقْ نِسِيْم الْهِبَايِبْ

 

فِيْ بِرْج عَالِيْ لَيْتِكْ تْعِيْش وِيَّايْ

وْتَتْرِكْ حَيَاة ٍ كِلّ ابُوْهَا غَرَايِبْ

 

الأرْض تَبْكِيْ حِزن وِالْكَوْن مَمْلايْ

حِقْد وْحِسَدْ وَاخْبَارْ كَذْب وْعِجَايِبْ

 

فِيْ خِلْوِتِيْ رَتَّبْت فِكْرِيْ مَعْ اشْيَايْ

وْعَالَجْت قَلْبِيْ لَى مِنْ الْحِبّ ذَايِبْ

 

وْ لا دَخَلْت بْسُوْق (بَايِعْ) وْ(شَرَّايْ)

مَادَامْ رِزْقِيْ عِنْد مِعْطِيْ الْوَهَايِبْ

 

يَوْم انّ غَيْرِيْ فِيْ مِشَاكِلْه مَبْلايْ

لِيْ خَاطِر ٍ عَنْ ضِيْقَةْ الْبَالْ تَايِبْ

 

فِيْ أرْبِعِيْن الْعِمر لَوْ بَاحْسِبْ خْطَايْ

كَنِّيْ طِفِلْ وَاشُوْف بِعْيُوْن شَايِبْ

 

تَحْت الضِّلُوْع الْعُوْج ضَمَّيْت شَكْوَايْ

وْعَلَى كِتُوْفِيْ شِلْت حِمْل الصَّعَايِبْ

 

فِيْ الْفَجِرْ أغْبِشْ وَيْن لِيْ طَابْ مَمْشَايْ

فِي رَوْض بِهْ عِشْب الْمِطَرْ وِالرِّكَايِبْ

 

يَكْفِيْ فَخَرْ إنْ صِرْت بِالطِّيْب مَطْرَايْ

مَا لِيْ وْمَالْ مْوَرِّيِيْن النِّشَايِبْ

 

غَالِيْ حِضُوْرِيْ عِنْد مِنْ عَزّ مَعْنَايْ

وِالاَّ عَنْ أهْل الْعَيْب مِقْفِيْ وْغَايِبْ

 

الْمَجْد بِعْيُوْنِيْ نَعَمْ صَارْ مَقْرَايْ

شِجَاعْ عِنْد الصِّدْق مَانِيْ بْهَايِبْ

 

الْبِعْد عَنْ زَيْف الْمَخَالِيْق مَنْوَايْ

فِيْ وَقْتَ يَنْزِفْ بِالْوِجَعْ وِالنِّوَايِبْ

 

هذا حِلِمْ عِمْرِيْ وْ لِيْ غَايَةْ رْضَايْ

مَادَامْهَا الأيَّامْ نَصْر وْغَلايِبْ

 

ثَابِتْ وْلا غَيَّرْت فِيْ الْحَقّ مَبْدَايْ

حَتَّى عَلَى قَبْرِيْ تِحَطّ النِّصَايِبْ