فضاءات

في خايع ٍ كِلِّهْ خَضَارْ وْنِوَاوِيْر

                       والأرْض عَطَّرْها مطَر عَقْرِبيّه

قَبْل الغياب وْقَبْل (حَزَّةْ عِشَا الطَّيْر)

                   وقَبِل قدوم اللَّيْل والشَّمْس حَيّه

مناظر ٍ تنعش نفوس المكاسير

                   تِلْبَسْ لِبَاسْ السِّحْر والجاذبيِّه

إبداع يِسْتَأْثِرْ بلِبّ الجماهير

                  لوحه مثيره باذخه سَرْمديّه

يكفي أنّها لمسات وال المقادير

                 لا اثنوا على هذي و هذي وْ ذِيّه

يا هاجسي ما للقصيده معاذير

                كِلّ الظِّروف تْحَرِّضْ الشَّاعريّه

إكْتِبْ وْعَبِّرْ عن خفا الحال تعبير

               وْجَسِّدْ فَرَحْك بْرَوْعَةْ المزهريّه

شِفْ هَالجماليَّات عن غيرها غَيْر

              ما كَنّها إلاّ تِحْفِةٍ عَسْجِدِيّه

عِشْها وصَوِّرْها بالاعماق تصوير

             وِاغْفِلْ عن هْموم الحياة الدِّنِيّه

مَتِّعْ نظَرْك وْ لا تجي للمحاذير

            وانْدَمْ وْهِلّ الدَّمْع عِنْد الْخِطِيّهْ

إحْلَمْ وَلا تِحْلَمْ بحِلْم العصافير

           إصْعَدْ بحِلْمِكْ في سما الأولويّه

عانِقْ فضاءات وْ شموخ المناعير

         وْقَبِّلْ ثَرَى صَرْح الفعول النِّقِيّه

رافِقْ خِيَارْ النَّاسْ دُوْن الْمَعَاثِيْر

         تِلْقَاهْ لا ضاقَتْ عليك الْفِضِيّه

ياقَفْ لموجِبْتِكْ بحِشْمه وتقدير

        ما عَشْعِشَتْ باعماقه النَّرْجِسِيّهْ

رفيقك اللَّي يِنْفَعِكْ بِالْمَعَاسِيْر

        والاّ الرَّخَا كِلٍ يقود السِّرِيّه

واحِدْ يسِدِّكْ عَنْ ألُوْف المثابير

       وحَسْنه وَ لا طَبْعَاً (تريليون) سَيّهْ

الصَّقْر ما يِجْهَلْ بعِرْف الصِّقَاقِيْر

       يَفْرِقْ وَلا يشْبه لشَكْل الحديّه

لا ضِقْت سِقْها مَعْ وِسَاع المعابير

      وِاطْلِقْ عَنَانْ الشَّوْف بِالْجَرْهِدِيّه

إشْرَبْ جَمَالْ الأرْض شِرْب المباهير

      وْقَنِّدْ خِوَا رُوْحِكْ برَوْحَهْ وْجَيّه

إدْلَهْ وْ وَاصِلْ بالْفَرَحْ رِحْلَةْ السَّيْر

    واقْطِفْ من اثْمَارْ الظِّروف الْهِنيّه

لا تَقْتِلْ الفرصه بسَجِّهْ وْتأخير

     بَادِرْ وْ(عِيْد الفطر) قَبْل (الضِّحِيّه)

إغْنَمْ تَرَى دِنْيَاكْ حِيْل وْمَعَاشِيْر

       لَحْظه.. وْتخْلِفْ هَقْوَةْ الأكْثِرِيّه