تفاهة الدِّنْيا بعيني مِنْ بَعَدْ جَرْحِيْ الأخِيْر
تفاهة أحْلام الفقارى في.. عيون الأثْرِيَا!
يا رَبّ جِعْل أسْمِيْ ما يِذْكَرْ بِالْحَيَاةْ إلاَّ بخير
وْجِعل طموحاتي لِفِعْل الخير مَا فِيْهَا رِيَا
أنا الفقير اللَّي يواسي عِمْره إنْ قالوا فقير
بِالجَنَّهْ.. وْسِذَاجَةْ الْمِتْرَفْ.. وْ زِهْد الأنْبِيَا
شَاعِرْ وْيَجْذِبْنِيْ عَلَى بَوْح الشِّعِرْ سِلْك الحرير
واقول ما لا افْعَلْ وَاغَنِّيْ لِلظَّلام وْ لِلضِّيَا..!
أمْدَحْ فِعِلْ سَابِقْ وَاهَلْ مَعْروف وَاقَدِّرْ كبير
وَاعْطِيْ الرِّجَالْ حْقوقها وَافْخَرْ بفِعْل الأنْقِيَا
وَاكْرَهْ دِرُوْب الْعِشْق لكنِّيْ ليا فاح العبير
أسْرِيْ لها مساري العَسَّاسْ لِدْيَارْ الْحِيَا
حَبَّيْت لكن غَلْطتي بِالْحِبّ حَبَّيْت بْضمير
وِاللَّي يحِبّوْن بْضمير وْصِدْق دايم أشْقِيَا!
يَا قَلْب سَامِحْنِيْ عَلَى اللَّي صار وِاللَّي ما يصير
اْلحِبّ: غفوة عقل ما بين الهدايه وِالْغِيَا!
جَرْح الْخِوِيْ غَيْر الجروح وْجَرْح مَنْ حَبَّيْت غَيْر
هذي شياطين الجروح وما سواها الأتْقِيَا!
ومن كثر ما جاني من الأثنين فِيْ الْوَقْت الأخير
أحيَانْ وِدِّيْ مَا عَلَى الدِّنْيَا.. حِبَايِبْ وِاخْوِيَا!!!