يا ماخِذْ الزَّوْد

يا اللَّى عن الحُوْر حايز أجْمَلْ وْصوفك

الخَدّ والعين والوَجْنه وْمِبْسَمْهِنْ

 

أوَّل ما شِفْتك ولاح بْناظري شوفك

شوفي خِدَعْني حِسَبْتِكْ واحده مِنْهِنْ

 

أجريت تبيان بين الحُوْر وِصْنوفك

وان قِلْت مِثْلك تراني بَس أجامِلْهِنْ!

 

عن عين عَيَّان ضَرّ أعيانه يْحوفك

جانِبْ.. وْجانِبْ عَشَان أجْبِرْ خواطِرْهِنْ!

 

حِسْنِكْ تِجَلَّى تَحَلَّى بالبها نوفك

مِنْك استغاظن وْظَنَّنِكْ تغايِرْهِنْ

 

عَتَّم نَزِو الشَّوف صَفْوه طَوْز عاصوفك

ما بان زَفَّان ضَيّه لوح بارِقْهِنْ

 

يا اللَّى من الفاظ فاطر أبْجَدْ حْروفك

ومن نجمة سْهيل لى سَمَّاك كَمَّلْهِنْ

 

تزهي سمات القَدِرْ من منبر رْفوفك

لِلْعِزّ فَرْحه وْلِلْغِزْلان قاِيدْهِنْ

 

يا ماخِذْ الزَّوْد لا تَشْهِرْ لي سْيوفك

جوارحي زود لا تجْرَح مشاعِرْهِنْ

 

ألحاظ عينك سِقَنّي سَمّ مَدْيوفك

ليلي مِزَجْتِهْ وْذِبْته في نظايرهن

 

بْلا سبايب عداوه غارت زْروفك

وِطْيور أبابيل من يقْدَرْ يقاوِمْهِنْ

 

أنْبِيْك يا زين إن شَفّت بي شْفوفك

ما اظِنّ غيرك معاييري يوازِنْهِنْ

 

من فضل جُوْدِكْ ومن لِطْفِك ومن رَوْفك

خِذْني بْهواده حواسي لا تضيّعْهِنْ

 

سِعْدي إذا باتّصالك تِسْمَحْ ظْروفك

مطامعي مِنْك نَظْراتي تِتَرْجِمْهِنْ

 

غَزْلي بريمي عْريمي خالطه صوفك

مَنْواي صوفي على غَزْلك يخالِطْهِنْ

 

أتْصَنَّعْ أعذار لاجل آمِرّ واشوفك!!

لمحة بصَر مِنْك تكفيني واهَوِّنْهِنْ

 

هموم نفسي سِبَايِبْهِنْ من عْزوفك

وآمال بالخير أحلامي تراوِدْهِنْ

 

ومن حِسْن فَضْلك ومن طِيْبِكْ وْمَعْروفك

فيك أمنياتي غَنَاتي لا تخَيِّبْهِنْ