آيَاتْ الآفَاقْ

مَهْمَا تَعَلَّى مَنْصِبِكْ مَا بْهَا فَرْق

لانّ الْمَنَاصِبْ مِنْ عِطَا رَبّ الارْزَاقْ

 

بَامْره يِسُوْق الْغَيْث فِـ.. غْيُوْمه الزِّرْق

وِالرِّيْح بَامْره وِالتِّصَارِيْف تِنْسَاقْ

 

رَاجِعْ ضِمِيْرِكْ قَبْل مَا تِخْسَرْ الصِّدْق

وِارْفَعْ جِبِيْنِكْ نَاظِرْ آيَاتْ الافَاقْ

 

لاَ تِخْدَعِكْ اْلاوْهَامْ يَا شَايِلْ الطَّرْق

الْوَقْت هَبَّةْ رِيْح وِسْنِيْنِكْ أوْرَاقْ

 

اْلايَّامْ تَمْضِيْ وِالْعِمِرْ يَسْرِقِكْ سَرْق

وِخْتَامْهَا قَبْرٍ بِطَيَّاتْ الاعْمَاقْ

 

عَجِّلْ بِمَدّ الْمَا عَلَى يَابِسْ الْحَلْق

تِلْقَى الْجِزَا فِيْ يَوْم تِيْبَسْ بِهْ أرْيَاقْ

 

وِانْ جَادْ وَقْتِكْ عَامِلْ النَّاسْ بِالرِّفْق

وِافْزَعْ لِمِنْ يَشْكِيْ وْفَرِّجْ لِمِنْ ضَاقْ

 

وِاحْسِنْ لِغَيْرِكْ فِيْ التَّعَامِلْ وْفِيْ النِّطْق

تَرَى الْكَلاَمْ الزَّيْن لِلنَّفْس تِرْيَاقْ

 

لاَ تْعَامِلْ الْعَالَمْ عَلَى الدِّيْن وِالْعِرْق

مَادَامْ (آدَمْ) مَرْجَعْ لْكِلّ الاعْرَاقْ

 

لاَ لِلتِّكَبِّرْ وِالتَّغَطْرِسْ عَلَى الْخَلْق

وِاتْبَعْ نِبِيّ اللّه عَلَى نَهْج الاخْلاقْ