هذَا الطِّرِيْق يْوَدِّيْ لْوَيْن؟!
لِلْهَمّ وِالاَّ مَخْرَجْ أحْزَانْ؟!
آشُوْف قِدَّامِيْ طِرِيْقَيْن
إمّا فِرَاقْ أوْ طَيّ نِسْيَانْ!
يَا عَيْن لاَ تَبْكِيْن تِكْفَيْن
حَلّ الْفِرَاقْ وْمَوْعِدِهْ حَانْ
لَوَّحْت لِيْ بَاطْرَافْ كَفَّيْن
كَنِّكْ بهذَا الْبِعْد فَرْحَانْ..!!
أحْزَنْ إذَا فَارَقْت وَافِيْن
وَاذْرِفْ عَلَيْهُمْ دَمْع الاعْيَانْ
كَنّ اْنقِطَعْ مِ الْقَلْب عِرْقَيْن
مَا احِسّ بِهْ مِنْ أمْس لِلآن..!!
وْكَنّ الْفِضَا وِالْكَوْن خَالِيْن
مِنْ بَهْرِجَاتْ وْ عِطر وَالْوَانْ
وْمَاتْ الزَّهَرْ وِسْط الْبِسَاتِيْن
مِنْ غِبْت عَنِّيْ مَاتْ ذَبْلانْ
يَا صَبْر أجِيْبِكْ كَيْف..؟ وِمْنَيْن؟!
بَايَّةْ طِرِيْق وْ أيّ عِنْوَانْ
غِضِّيْ النِّظَرْ وِانْسِيْه يَا عَيْن..
مَادَامْ دَمْعِكْ فِيْه مَا بَانْ
وْيَا قَلْب لا تِتْبَعْ مِقَفِّيْن
وِاللَّى نِسَى لاَ تْعِدّ بِهْ شَانْ
اللَّى ابْتَعَدْ مَرَّهْ وْمَرْتَيْن
قِرْبِكْ وْبِعْدِكْ عَنْه سِيَّانْ