يَا الشِّمَمْ يَا (عْيَالْ زَايِدْ) يَا الشِّمَمْ
وِاْلهِمَمْ مَوْرُوْث مِنْ ذَاكْ الْهُمَامْ
لَى تَعَلَّى بَيْن هَامَاتْ وْهِمَمْ
يَنْثِنِيْ لِهْ الْمَجْد طَوْعٍ وِالْتِزَامْ
ذَاعْ صِيْتِهْ بَيْن سَادَاتْ وْ أمم
دَوَّنْ التَّارِيْخ حِبِّهْ فِيْ الأنَامْ
ذَاكْ (زَايِدْ) يِرْحَمه رَبِّيْ.. رِسَمْ
صَرْح دَوْلَتْنَا عَلَى نَهْجه وْعَامْ
وِانْ عِنَيْت الْمَجْد مِنْ ذَاكْ الشَّهَمْ
وِالشَّهَمْ مِنْ ذَاكْ مَجْدِهْ مَا يِرَامْ
وِانْت يَا (مْحَمَّدْ) عَلَيْك الْوَصْف تَمّ
سِعْد مِنْ يِنْخَاكْ يَا فَذّ الْكِرَامْ
وِانْتَخَى (سَلْمَانْ) لِهْ فِيْ (عْيَالْ عَمّ)
يَدْرِكُوْن الْمِعْتِدِيْ فِيْ ظَرْف زَامْ
وِانْت يَا (بُوْفَهْد) عِنْوَانِكْ حَزِمْ
تِرْدَعْ الْعَيَّالْ وِ تْحَقِّقْ مَرَامْ
لَيْن يَاتِيْ اْلحَقّ لاصْحَابه لَزِمْ
يَا ملَبِّيْ الْحَزْم مِنْ دُوْنِكْ حِزَامْ
وِابْشِرْ بْلَى لِكْ حِلِيْفٍ مِلْتِزِمْ
مَا تِوَانَى بَيْن فِعْلِهْ وِالْمِقَامْ
وْكَنّ فِيْ (مْحَمَّدْ) خِصَالْ (اْلمِعْتَصِمْ)
يَوْم لَبَّى لِلْمِنادِيْ بِاعْتِزَامْ
ذَاكْ (بُوْخَاِلْد) عِجِيْد الْقَوْم هَمّ
وْمِنْ عَلَى يَمْنَاهْ قَوْمٍ مَا تِضَامْ
هُمْ حِمَاةْ الدَّارْ هُمْ صَرْح وْعَزِمْ
هُمْ حِصُوْن الْمَجْد مَدْلُوْل الْكَلاَمْ
وِقْصِدَوْا رُوْس الْعِوَالِيْ فِيْ الْقِمَمْ
عَاصِفَاتْ الرِّيْح فِيْ جَوْف الْغُمَامْ
تَدْرِكْ الأهْدَافْ وِتْبَاغِتْ خَصِمْ
نَوْرِدِهْ حَوْض الْمَنَايَا فِيْ غِتَامْ
وِانْ عِطَفْ دَرْبه وْيَانَبْ بِالْيَعَمْ
كَاسِحَاتْ الْبِيْد يَدْعِنِّهْ حِطَامْ
وِانْ تَهَايَا لِهْ عَلَى بَحْرٍ خِضِمّ
رَاجِمَاتْ الْيَمّ حَطَّنِّهْ يَهَامْ
شَفّ مِنْ شَفّ الّذي قَايِلْ.. وْتَمّ
قَوْله الْمَشْهُوْر.. حَقٍ مَا يِنَامْ
يَامِرْ وْنِحْنَا نِلَبِّيْ لِهْ.. نَعَمْ
بَانِسُوْم الرُّوْح سَوْم ٍ فِيْ الْمِسَامْ
بَلِّغُوْا الْعَايِلْ عَلَى قَطْع النِّسَمْ
نَدْرِكِهْ مَا بْين حِلِّهْ وِانْهِزَامْ
لَيْن نَشْفِيْ مِنْ غِلِيْل الرُّوْح دَمّ
مِنْ فِعِلْ شِبَّانْ عَالِيْن الْمِقَامْ
يِرْتِسِمْ لِيْ فِيْ الذِّهِنْ حِبّ وْعَلَمْ
يَمْتِزِجْ مَا بَيْن رُوْحِيْ وِالْعِظَامْ
وِانْثِنَيْت آقَبِّلْ تْرَابه قَسَمْ
لا يمِسِّهْ ذَاكْ لِمْعادِيْ حَرَامْ
وِالتِّكَاتِفْ عِزّ غَايَتْنَا وْلَمّ
وِالتَّحَالِفْ رَمْز وِحْدَتْنَا وْدَامْ
وِالنَّصِرْ مَحْتُوْم وِابْشِرْ بِالْحَسِمْ
ذَا مَرَامْ (عْيَالْ زَايِدْ).. وِالسَّلامْ