يَا مَرْحَبَا تَرْحِيْبَةْ أكْرَامْ بَاكْرَامْ
بِالضَّيْف لَى غَالِيْ عَلَيْنَا مِقَامه
(سَلْمَانْ) يَا رَمْز الْعِرُوْبه وْالاِسْلاَمْ
يَا رَاعِيْ الْمَجْد التِّلِيْد وْحِسَامه
رَحَّبْ (خِلِيْفِهْ) بِكْ تَرَاحِيْبٍ جْسَامْ
عَدّ النِّجُوْم وْعَدّ رَمْل الْعَدَامه
وْرَحَّبْ بِكْ (مْحَمَّدْ) وْطَيْر السَّعَدْ حَامْ
وْوَجْه (الإمَارَاتْ) إبْتَهَجْ بِابْتِسَامه
وْحَيَّاكْ (أبُوْ خَالِدْ) وْرَفَّتْ لِكْ أعْلامْ
وِالدَّارْ هَنَّتْ ضَيْفَهَا بِالسَّلامه
نِحْنَا عَلَى دَرْب الْمَعَالِيْ وْالاِقْدَامْ
مِتْكَاتِفِيْن يْلَيْن يَوْم الْقِيَامه
اللّه وَهَبْنَا حَزْم وِعْزُوْم ٍ عْظَامْ
فِيْ وَجْه باغِيْ الشَّرّ نِفْنِيْ نِظَامه
نَحْمِيْ حِمَى الأوْطَانْ وِالْوَعْد قِدَّامْ
فِيْ دَمِّنَا يَجْرِيْ الْوِفَا وِالشَّهَامه
دَمْنَا تَخَالَطْ بِالنِّسَبْ بَيْنِنَا ارْحَامْ
قَبْل يْتِخَالَطْ فِيْ جِيُوْش الْكَرَامه
نِحْنَا لِكُمْ يَا (بُوْفَهَدْ) دِرْع وِحْزَامْ
وْيَا سِعْد مِنْ هُوْ (عْيَالْ زَايِدْ) حِزَامه
صَقْر (السِّعُوْدِيِّهْ) لِيَا سَتَّلْ وْحَامْ
حِمْنَا مَعَ حَوْمه وْشِمْنَا مِشَامه
سِرْبٍ لـ (بُوْ خَالِدْ) عَلَى النَّصِرْ عَزَّامْ
لَي رَامْ مَا عَوَّدْ بِلَيَّا مَرَامه
نِتْبَعْ ثَرْ (الشَّيْخ الْفَلاحِيْ) بِالاَقْدَامْ
وِفْعُوْلنا تْتَرْجِمْ مَعَانِيْ كَلامه
تِشْهَدْ لِنَا (مَأْرِبْ) وْتِشْهَدْ لِنَا (شْبَامْ)
وْتِشْهَدْ لِنَا (جْبَال السَّرَاهْ) وْ(تِهَامه)
إنَّا وِقَفْنَا صَفّ فِيْ وَجْه الاخْصَامْ
وَقْفَةْ مِخُوّهْ جَنِّبَتْنَا الْمَلامه
فِيْ عَاصِفَةْ حَزْم ٍ تِخَلَّدْ لِلايَّامْ
هَبَّتْ عَلَى (الْحُوْثِيْ) وْشَلَّتْ خِيَامه
هَبَّتْ مِنْ (الْعَارِضْ) لَهَا (بُوْفَهَدْ) قَامْ
وَ(ابُوْظَبِيْ) قَامَتْ لِزَوْد احْتَرَامه
قِمْنَا سِوَى لِلْحَرْب ضِرْغَامْ ضِرْغَامْ
حَتَّى دَحَرْنَاهُمْ نِعَامه.. نِعَامه
نِشْرَبْ مِنْ الْعِدّ وْسَرَايَاهُمْ حْيَامْ
وْنَسْقِيْ طَلايِعْهُمْ بِكَاسْ النِّدَامه
لاجْل (الرِّيَاضْ) وْ(ابُوْظَبِيْ) كِلِّنَا سَامْ
رُوْحه وْدَمِّهْ .. مَا عَلَيْهَا نِدَامه
هذا (خَلِيْج الْمَجْد) وِالْمَجْد مَادَامْ
إلاَّ لِمَنْ كَانَتْ بِلادِهْ غَرَامه
وْهذا (خَلِيْج الْخَيْر) يَا كِلّ مِقْدَامْ
وِانْتُوْ حِصُوْنِهْ يَا قِرُوْم الزَّعَامه
اللّه يِوَفِّقْنَا شِعُوْب ٍ وْحِكَّامْ
فِيْ ظِلّ وِحْدَتْنَا لِيَوْم الْقِيَامه